Covalima Pasiente Covid-19 Ativu 100, Na’in-74 Baixa Iha Uma

Administradór Munisípiu Covalima, Fransisco de Andrade ko’alia hela ba jornalista www.tempotimor.com iha tempu balun liuba. Foto Tempo Timor

Tempotimor (Covalima)- Munisípiu Covalima dadaun pasiente Covid-19 hamutuk 100 mak hetan asistensia husi pesoal saúde iha izolamentu no husi númeru ne’e na’in-74 mak baixa iha uma ka auto-izolamentu.

“Ita iha kazu foun 19, nune’e kazu ativu hamutuk 100, iha izolamentu hamutuk 26, maibé sira ne’ebé halo auto-izolamentu ne’e hamutuk 74,” dehan Administradór Munisípiu Covalima, Fransisco de Andrade ba www.tempotimor.com iha nia knaar fatin, Sesta (11/06).

Lee Notisia Seluk

Tuir relatóriu husi Diretór Servisu Saúde Munisípiu Covalima (SSMC), Filipe Fereira Lemos  ne’ebé hato’o ba katak, totál Covalimaoan ne’ebé durante ne’e konfirmadu ba moras Covid-19, sura rekuperadu no sei ativu hamutuk 237.

“Atualmente Covalimaoan hamutuk 237 mak afetadu ona ba Covid-19, ne’ebé kompostu husi mane na’in 155 no feto 82,” Nia afirma.

Haree ba kazu ne’ebé kontinua aumenta, maka administradór husu ba sidadaun sira iha munisípiu Covalima nafatin kumprimenta ba regras Organizasaun Mundiál ba Saúde (OMS) no Ministériu Saúde nian hanesan fase liman ho sabaun, uza máskara no distansiamentu sosiál pelumenus metru ida.(*)

Notisia seluk