Diretór EMC Husu Inan-Aman Sai Profesór iha Uma

Diretor Edukasaun Munisipiu Covalima (EMC), Edmundo Ferreira ko'alia hela ho www.tempotimor.com iha edifisiu Edukasaun Covalima. Kinta (10/06). Foto Tempo Timor

Tempotimor (Covalima)-Relasiona ho pandemia Covid-19 ne’ebé seidauk husik Timor-Leste livre, mak diretór Edukasaun munisípiu Covalima (EMC), Edmundo Ferreira husu Inan-Aman atu sai mestre hodi ajuda hanorin oan sira iha uma, liliu ba sira ne’ebé seidauk hatene lee no hakerek.

“Ita la feridau eskola tanba ne’e husu inan-aman sira haka’as an labele husik oan sira livre, tanba maioria seidauk hatene lee no hakerek, liliu primeiru anu no segundu anu, tanba ita la uza termu ida feriadu, ita halo suspesaun tanba moras Covid-19 ne’e, maibé la signifika feriadu, ne’ebé ba sira ne’ebé mak nivél boot husi segundu no terseiru síklu di’ak, tanba sira hatene lee no hakerek, maibé inan-aman sira nafatin orienta,” dehan diretór Edmundo www.tempotimor.com iha nia servisu fatin, Kinta (10/06).

Lee Notisia Seluk

Nia Afirma, mestre ho mestra sira fahe de,it livru ba estudante sira, inan-aman sira mak orienta atu oan sira estuda iha uma.

“Livru ne’e ba estudante sira ne’ebé la asesu kanál rádiu no televisaun no liña internet, sira estuda iha uma hodi asesu livru ne’ebé mak fahe ba sira. Ba sira ne’ebé asesu rádiu no televisaun no kaer telefone android bele asesu iha ministériu edukasaun nia pagina facebook hodi asesu matéria,” hatete Nia.

Entertantu, totál estudante eskola bázika hamutuk 14.443 no edukasaun pré-eskolár hamutuk 968, nune’e totál estudante 982,443, ne’ebé la inklui estudante husi eskola katólika sira iha munisípiu Covalima.(*)

Notisia seluk