Tempotimor (Covalima)-Relasiona ho polítika governu ne’ebé atu apoiu uma ba kbi’it laek sira iha teritóriu nasionál, mak Programa Nasionál Dezenvolvimentu Suku (PNDS) apoiu ona orsamentu rihun $14.091.000 ba programa Uma ba Kbi’it Laek (UKL) iha munisípiu Covalima ne’ebé ho totál benefisiáriu hamutuk uma 90.
Tuir Diretora delegasaun PNDS Covalima, Zélia Freitas da Conceição katak, benefisiáriu na’in 90 ne’ebé manan ba programa UKL iha Covalima ne’e kompostu husi suku 30.
“Programa Uma ba Kbi’it Laek (UKL) ba tinan ida ne’e PNDS hala’o ba suku 30 iha Covalima ho totál uma 90, ne’ebé iha suku ida hetan uma tolu bazeia ba aldeia sira ne’ebé sai alvu liuhusi faze sosializasaun, faze re-verifikasaun no faze finalizasaun. Tanba dezeña BOQ mós remata ona, hein preparasaun ba aprovizionamentu para ba implementasaun” dehan Diretora ne’e ba www.tempotimor.com iha nia knaar fatin, Segunda (14/06).
Diretora ne’e afirma, prosesu identifikasaun ba benefisiáriu sira ne’ebé sai manan na’in ba programa UKL ne’e tuir matadalan ne’ebé Ekipa Verifikasaun Benefisiáriu (EBB) simu husi nasionál.
“PNDS fasilita de’it prosesu ne’ebé iha, ekipa verifikasaun benefisiáriu sira mak identifika, tanba ekipa ne’e kompostu husi ema na’in ualu ne’ebé lidera husi xefe suku rasik no membru sira mak reprezentante veteranu, saúde, Ofisial Polísia Suku (OPS), xefe suku, xefe juventude inklui KPA ne’ebé sai hanesan jestaun suku nian hodi halo verifikasaun no identifika liliu ba família kbi’it laek hodi hetan oportunidade sira ne’e,” imforma Nia.
Entertantu tuir dadus ne’ebé molok ne’e governu lansa ona katak, iha tinan 2021 governu sei hari’i uma ba kbi’it laek sira iha teritóriu nasionál hamutuk 1.772 liuhusi programa Uma ba Kbi’it Laek.(*)
