Tempotimor (Covalima)-Sábadu (19/06/2021) ne’e, Ministru Edukasaun Juventude no Desportu (MEJD), Armindo Maia vizita no husu ba estudante Eskola Sekundária Jerál Públika (ESJP) númeru 1 Suai atu aprende didi’ak, tanba futuru Timor-Leste iha jerasaun foun sira-nia liman.
“Parabéns ba ESJP númeru 1, Inan-Aman profesór no estudante sira iha ne’e. Tanba ha’u mai iha tinan 2020 no ohin ha’u mai fali fatin ne’e komesa mudansa buat barak hanesan jardim no estudante sira bele asesu ona internet, entaun ba oin estudante sira tenke haka’as aan tamba futuru Timor-Leste iha imi nia liman rasik,” dehan Ministru Armindo hafoin vizita ESGP nú. 1 Suai, Sábadu (19/06).
Governante ne’e mós promete ba estudante estudante no profesór sira katak, tempu badak MEJD sei apoiu tan sala tolu inklui konstroi tan sentina ba estudante sira.
Iha sorin seluk diretór ESJP Francelino Freitas Carvalho orgullu ho prezensa Ministru MEJD nian, mai eskola refere.
“Apresia tebes ba ministru edukasaun nia prezensa tanba ohin bele hakat mai lansa ona ami-nia Website no orsamentu ne’e kontribuisaun husi Inan-Aman iha tinan 2020 ne’ebé ho totál $2.500 hodi kria website iha ami-nia eskola ne’e no selu ba ICT Covalima oan rasik no balu hodi hadi’a jardim,” katak Nia.
Entretantu totál estudante iha ESJP númeru 1 Suai hamutuk rihun 2.175 no no profesór sira hamutum 95.(*)
