Tempotimor (Covalima)-Segunda (28/06/2021) ne’e administradór munisípiu Covalima, Francisco de Andrade iha nia Servisu fatin hateten, Orsamentu Jerál Estadu (OJE) tinan fiskál 2021 ba munisípiu Covalima foin ezekuta 40%.
“Ezekusaun orsamentu munisípiu Covalima foin lalais ami enkontru regulár tuir dadus iha nasionál orsamentu 2021 ba munisípiu Covalima ezekuta ona 40%,” Hateten Adminitradór Fransisco de Andrade ba www.tempotimor.com Segunda (28/06).
Nia afirma, alokasaun orsamentu jerál estadu tinan 2021 ba munisípiu Covalima hamutuk tokon $4.7.
“Ezekusaun orsamentu atinji ona 40% ezekuta ba selu saláriu vensimentu hamutuk tokon $1.285 bens servisu tokon $1.105 tranferénsia públiku tokon $1.582, kapitál menor rihun $267.000 no kapital dezenvolvimentu rihun $ 442,008,” dehan Nia.
Administradór ne’e mós akresenta, alokasaun ba kapitál dezenvolvimentu ne’e ba projetu foun rua hanesan konstrusaun rezidénsia administradór minisípiu Covalima hamutuk rihun $262,570 no konstrusaun edifísiu postu administrativu Maucatar hamutuk rihun $179.438,” Nia tenik.
Entertantu Projetu foun rua ne’e seidauk implementa tanba tuir prosedimentu atu implementa projetu no BOQ tenke aprova husi Ajensia Dezenvolvimentu Nasional (ADN).(*)
