Tempotimor (Covalima)-Grupu Servisu hakma’an todan hamutuk (Segutu) ne’ebé durante ne’e kuda produtu lokal Pateka, Modo, Batar, Fore no seluk tan hetan estragus barak, tanba Estadu Emerjénsia (EE) no Serka Sanitária (SS) la fó tempu hodi transporta ba merkadu ikluilori ba Dili.
Tuir xefe Grupu Segutu, Maria da Silva katak, durante estadu emerjénisa husi inísiu to’o agora fó impaktu boot ba produtu lokál ne’ebé iha, tamba ne durante ne’e produtu lokál barak sai dodok, tamba durante ne’e laiha movimentu transporte husi kapitál munisípiu ba sidade Dili.
“Durante EE ne’e kareta sira la halai, para ami lori ami-nia produtu sira ne’e ba iha merkadoria, ne’ebé ami-nia modo ho batar sira ne’e sai fohuk de’it, ne’ebé ami iha grupo nia laran maka vítima, tamba susar ba osan, sa tan maka ami-nia oan sira eskola, ne’e ami araska liu,” dehan xefe grupu ne’e ba www.tempotimor.com liuhusi via telefone, Kuarta (07/07).
Xefe grupu ne’e afirma katak, triste, maibé kontinua esforsu hodi kuda fini, ho prinsípiu ida katak labele mate ba hamlaha maske laiha osan.
“Ami sente triste, dalaruma ami hanoin ami-nia produtu sira ne’e sente trauma fali, tamba ami lori ba merkadu iha Dili halo nusa, ami rona Covid-19 ne’e la hotu loos, maibé ami nafatin lere hodi kuda nafatin, atu nune’e ami laiha osan nomós labele mate ba hamlaha,” Maria esplika.
Grupo Segutu ne’e lokaliza iha aldeia Aitaman, Suku Maudemo ne’ebé kompostu husi servisu na’in hamutuk na’in 15 ne’ebé kompostu husi feto na’in sanulu no mane na’in lima. Ne’ebé durante ne’e hetan apoiu husi Centro Comunidade Covalima (CCC), NGO Belun, Fokupers inklui UN WOMEN.(*)
