Tempotimor (Covalima)-Kinta (08/07/2021) ne’e vise Ministru Administrasaun Estatál (MAE), Lino de Jesus Torezão ofesialmente halo inagurasaun ba sede suku rua iha postu Administrativu Fatululik ne’ebé hetan ona reabilitasaun.
Hafoin inagurasaun sede suku ne’e, vise ministru dehan, orsamentu ba reabilitasaun sede suku rua iha postu Fatululik, ne’e nia valór orsamentu la hanesan.
“Reabilitasaun sede suku Fatululik ho totál orsamentu hamutuk $26.21.11 no suku Taroman ho orsamentu $11,622.20,” dehan Vise Ministru Torezão hafoin inagura sede suku rua ne’e, Kinta (08/09).
Governante ne’e afirma, edifísiu inagura ona, maibé seidauk iha fasilidades para konsellu suku sira atu utiliza hodi atende komunidade sira.
“Ita hari sede suku ita presiza fasilidades, atu nune’e atende komunidade, maibé dadaun ne’e fasilidades hanesan kadeira no meza prepara ona hein lori mai de’it ona, inklui sede suku ida-idak sei hetan hotu komputadér, ne’ebé hein mai de’it ona,” katak nia.
Entretantu tuir dadus ne’ebé iha katak, durante tinan 2021 governu reabilita sede suku 250 iha teritóriu nasionál depois suku seluk kontinua iha tinan 2022.
“Reabilitasaun sede suku ba tinan ne’e hamutuk 250, tinan oin sei iha tan 202, depois ekipa jestaun suku sira maka sei konstrui bazeia ba matadalan PNDS nian,” katak Nia.
Iha momentu hanesan, xefe suku Taroman, Leonel Asa kontenti tanba sede suku reabilita maibé sei sei menus fasilidade.
“Ami kontei tebes ho governu nia planu ne’e liuhusi Programa Nasionál ba Dezenvolvimentu Suku (PNDS) ne’ebe reabilita ona ami-nia edifísiu suku nia, maibé problema ida ba ami mak iha sede suku laiha kadeira no meza nomós komputadór atu atende komunidade sira kona-ba halo deklarasaun ruma, maibé ohin Vise MAE promete ona ba ami katak, iha tempu badak atu fó apoiu ba ami, ne’ebé ami hein de’it,” hateten xefe suku Taroman.
Entertantu inagurasaun ba suku rua ne’e hetan bensaun husi Amu Parókia CMF Fohorem, Titus Germanus Tae.(*)
