Tempotimor (Covalima)-Ministériu Solidariedade Sosiál no Inkluzaun (MSSI) kontinua apoia nesesidade báziku ba familia vulnerável hamutuk 99 iha postu administrativu Maucatar munisipiu Covalima.
Tuir diretór (MSSI) Munisípiu Covalima, Agapito Axis katak, MSSI apoia tan komunidade vulnerável hamutuk uma-ka’in 99 iha suku Matai, postu administrativu Maucatar ne’ebékompostu husi feto na’in 66 no mane na’in 33.
“Situasaun Covid-19 halo imi ba mai ladi’ak atu buka osan no buat seluk tan, tanba ne’e mak ha’u ho administradór munisípiu Covalima nomós imi-nia xefe suku rasik servisu hamutuk hodi foti imi-nia naran iha suku Matai ne’e hodi hetan fos, ne’ebé imi ema ida hetan saka ida ho kilograma 25 hodi aguenta imi-nia uma laran,” dehan Diretór MSSI Covalima Agapito ba komuniadde vulnerável sira, Tersa (27/07).
Iha tempu hanesan Administradór Munisípiu Covalima, Fransisco de Andrade katak, apoiu refere la’ós to’o iha ne’e de’it, maibé kontinua ba maluk seluk ne’ebé seidauk hetan.
“Ami nu’udar imi-nia autoridade lokál sei esforsu tomak hodi buka ajuda, nune’e Covalima labele mate ba hamlaha, mate ba buat seluk ka moras ne’e ita nia vida, maibé mate ba hamlaha mak keta, tanba ami prontu ajuda no buka dalan hodi apoiu ita boot sira ne’ebé kbi’it laek no oan ki’ak sira,” hateten nia iha nia Diskursu
Alende ne’e, reprezentante komunidade suku Matai, Elfina Cardoso apresia ba autoridade munisípiu Covalima no lokál nia kooperasaun hodi apoia ba kbi’it laek sira. “Ami sente kontenti tebes ho sira-nia apoiu ida ne’e ba ami, maske ho fos saku ida maibé iha valór ba ami, tanba ho ami-nia xefe suku nia esforsu ami bele hetan fos saku ida iha tempu susar hanesan ne’e,” nia tenik.(*)
