Tempotimor (Covalima)-Sekretáriu Estadu Arte no Kultura (SEAK) nia Diretór Jerál ho ekipa halo sensibiliza ba autoriedade lokál sira kona-ba ratifikasaun konvensaun UNESCO 1975/2003 no 2005 ba lia-na’in, estudante, lider komunitáriu no autoridade postu administrativu sira.
Iha sensiblizasaun ne’e, diretór jerál Manuel Ximenes Smith katak, sensibilizaun iha suku Suailoro tanba sentrál ba autoriedade lokál sira iha Suai.
“Atu haree kona-ba oinsá papél konjunta entre governu, komunidade, juventude, katuas lia-na’in sira, tanba ita hatene, se laiha ema kultura la eziste, entaun iha ema mak kultura eziste,”dehan DJ Manuel hafoin sensibiliza konvensaun UNESCO nian ba autoriedade lokál sira iha suku Suailoro, postu Suai, Munisípiu Covalima, Tersa (27/07).
Nia afirma, kultura hanesan patrimóniu ne’ebé presiza konversa, tanba ne’e importánsia atu autoridade lokál sira hatene, nune’e labele halakon kultura nomós identidade ema Timor-Leste nian.
“Ohin mai nafatin halo sensiblizasaun iha suku Suailoro, hodi hametin liután kulrtura iha suku Suailoro, laós ita minimiza iha suku seluk, maibé ita haree no hatene agora dadaun Suailoro nafatin kultura Orijen, tanba ne’e ita ohin nafatin mai iha ne’e hodi fó hanoin ba sira ne’ebé iha ne’e,” Nia komenta.
Alende ne’e xefe suku SuaiLoro, Martinho Mendonça mós husu ba ema hotu oinsá bele partisipa ativu atu hamoris fali kultura, tanba kultura mak hanesan identidade Timor nian.
“Agora dadaun ita-nia kultura atu hamate ka atu lakon ona, tamba ne’e ita hotu tenke partisipa máximu iha área kultura nian hanesan dansa kultural para oinsá bele hamoris fali ita-nia kultura orijinal sira iha ita-nia suku sira, liu-liu iha munisípiu Covalima,” Xefe suku ne’e informa.(*)
