Tempotimor (Covalima)-Fundasaun Alola hetan fiar husi Ajénsia United Nations Population Fund iha Timor-Leste (UNFPA-TL) hodi distribui pakote maternidade inan-isin-rua sira iha munisípiu sia inklui Rejiaun Administrativa Espesiál Oekusse Ambeno (RAEOA).
Tuir Koordenadora Sentru Rekursu feto ba programa advokásia, Apolonia Maria da Costa katak, iha munisípiu Covalima ekipa entrega pakote maternidade hamutuk 35 ne’ebé distribui ba Postu Saúde Suai 20 no 15 ba Ospitál Referál Suai (ORS).
“Pakote ne’ebé maka iha hamutuk 245, entaun desloka mai iha Covalima 35, ne’ebé 20 ba postu saúde 15 ba ORS. Entaun kada pakote maternidade kompostu husi pasta ida, biti ida, lipa depois patu de bañu ba feto haat, kamiza ba ema boot, sabaun no xampo, eskova nehan ho pastadente ida, tolla rua, sinelos no seluk tan,” dehan Apolonia ba média sira hafoin distribui fasilidade sira ne’e ba inan-isin-rua sira iha Suai, Ohin (12/08).
Aleinde ne’e ekipa sira mós fahe brosura kona-ba foinsa’e sira ho idade puberdade atu hakbesik aan ba saúde kuandu hetan komplikasaun.
“Ita mós fahe brosura matadalan sira kona-ba foinsa’e sira ho idade puberdade hodi haforsa sira oinsa iha moras ruma bele hakbesik-aan ba Pesoál saúde sira inklui mós informasaun sira kona-ba kazu violensia doméstika nian noa seluk tan,” katak Nia.
Fundasaun Alola mós kontinua enkoraza ba inan-isin-rua sira atu hakbesik-aan nafatin ba sentru saúde hodi hetan tratamentu saúde ne’ebé di’ak.(*)
