Tempotimor (Covalima)-Maske iha tinan 2017 ekipa tékniku husi Eletrisidade de Timor-Leste (EDTL) instala ona liña eletrsiade ba aldeia Aitos, maibé to’o agora eletrisidade refere seidauk lakan.
Tuir eis xefe aldeia Aitos, Jacinto dos Santos katak, monta riin eletrisidade no fiu sira ba kada uma instala hotu ona iha tinan 2017 maibé to’o agora ahi seidauk lakan.
“Agora ami rona informasaun husi nai-ulun sira iha postu Fohorem ne’e dehan, suku Lactos no suku Ucekai iha Zumalai no iha fatin seluk katak iha tinan ne’e atu lakan ona, ne’ebé ami husu tanba saida mak iha ami nian aldeia Aitos to’o agora seidauk lakan,” dehan eis xefe aldeia ne’e ba www.tempotimor.com iha nia knaar fatin, Kinta (19/08).
Komunidade ne’e mós husu ba governu labele halo diskriminasaun ba nia povu rasik iha Timor-Leste.
“Husu ba autoridade postu, munisípiu no parte iha nasionál labele halo diskriminasaun ba ami povu iha rai ida ne’e, ami husu tenke ko’alia ba ami povu iha ne’e tanba hein monta de’it lampu maibé sira lakohi, agora muda fali ba suku seluk mak atu lakan fali, ne’ebé ida ne’e sira tenke rezolve tanba tinan barak ona, no ami rona imformasaun katak husi governu mak seidau selu ba kompañia ne’ebé antes ne’e instala rin no fiu eletrisidade sira,” nia esplika.
Iha tempu hanesan koordenadór EBF Aitos, Faustino Ferreira dehan, maske instala ona eletrisidade maibé komunidade kontinua uza lampurina no solar panel.
“Ami iha ne’e triste tebes, uma hotu-hotu hetan ona instalasaun ba eletrisidade, maibé ate agora seidauk lakan nafatin, ne’ebé tamba saida mós ami la hatene,” nia tenik.
Entertantu liga ba kestaun ne’e, www.tempotimor.com tenta atu konfirma ho kompañia ne’ebé antes ne’e manan tenderizasaun refere, maibé kompañia ne’e rasik nia paradeiru seidauk hetan.(*)
