Tempotimor (Covalima)-Komisaun Anti Korupsaun (KAK) sosializa lei númeru 7/2020 kona-ba Médida Prevensaun Konmbate Korrupsaun (MPKK) ba ajentes públiku ne’ebé asume knaar hanesan diretór sira iha Munisípiu Covalima.
“Ohin ami mai iha ne’e, hala’o sosializasaun ba ita-nia ajentes públiku sira ne’ebé ezerse funsaun hanesan diretór iha Munisípiu Covalima,” dehan Adjuntu Investigasaun KAK, Augusto da Costa Castro ba www.tempotimor.com iha salaun administrasaun munisípiu Covalima, Kuarta (25/08).
Nia afirma, lei númeru 7/2020 ne’e espesial liu ba funsionáriu sira ne’ebé asume responsável hanesan diretór no setor privadu sira iha munisípiu sira hodi kombate no prevene korupsaun.
“Aktividade ne’e hahú iha munisípiu Covalima rasik ba diretór sira iha nivel munisipál no diretór delegasaun sira ne’ebé iha liña ministériu sira ne’ebé destakadu iha munisípiu Covalima ninian, no hanesan diretór eskola sira enjeral ba ema ne’ebé mak hetan kargu xefia sira, ne’ebé mak potensial deklarante riku-soin iha ne’e nomós maluk emprezáriu sira mós mai atu rona sosializasaun ida ne’e, tanba prevensaun ida ne’e espesial liu ba iha rejime deklarasaun bens no intreses ba kargu xefia sira iha diresaun ida-idak,” Haktenik nia.
Iha sorin seluk adjuntu administradór munisípiu Covalima, Afonso Nugeira Nahack agradese ba Komisaun Anti Korupsaun tanba divulga ona informasaun ba funsionáriu no kargu xefia sira nomós seitór privadu sira iha munisípiu Covalima.
“Agradese no apresia ba KAK nia ativdade sosializasaun ida ne’e, tanba iha disponibilidade bele fahe informasaun ba ita kona-ba médida prevensaun kombate korupsaun ba funsionáriu no kargu xefia sira iha Munsipiu Covalima,” Nia dehan.
Entertantu iha sosializasaun refere hetan partisipasaun máximu husi funsionáriu públiku no diretór sira inklui setor privadu sira iha munisípiu Covalima.(*)
