Tempotimor (Covalima)-Tuir Koordenadora Pradet Fatin Hakmatek munisípiu Covalima, Imelda Imaculada Morreira katak, husi fulan Abril to’o Fulan Agostu 2021, Pradet Fatin Hakmatek Suai rejista kazu hamutuk 26 ne’ebé ho tipu kazu oioin.
“Husi Fulan Abril to’o Agostu 2021, Pradet Fatin Hakmatek Suai rejista ona kazu 26 ne’ebé husi kazu sira ne’e kompostu husi kazu abandonadu iha 4, violénsia doméstika formal iha rua, violénsia doméstika loos de’it iha 10, violénsia doméstika ho violasaun sexuál ne’e iha ida, violénsia fíziku maibé la’ós violénsia doméstika ne’e iha rua, violénsia sexuál la’ós violénsia doméstika ne’e iha 6 no ikus liu violénsia fíziku maibé la’ós violénsia doméstika “hetan baku husi kolega ka mestri sira ne’e ida. Nune’e kazu hirak ne’e ami prosesa ona iha Ministériu Públiku (MP,” dehan Imaculada ba www.temotimor.com iha nia knaar fatin, Kuarta (25/08).
Koordenadora ne’e afirma, kazu sira ne’ebé Pradet rejista ne’e violénsia doméstika maka númeru aas kompara ho kazu seluk.
“Kazu violénsia doméstika maka númeru as liu, kazu ne’e númeru ass bebeik tamba ita la iha konsiénsia, lakohi fiar malu, lakohi respeita malu, buat hotu-hotu hakarak rezolve ho violensia, tamba ne’e maka númeru kazu violénsia doméstika ne’e sa’e bebeik ne’e,” Imaculada esplika.
Entertantu Kordenadora Pradet ne’e husu ba komunidade sira iha Munisípiu Covalima atu moris ho domin no dame, respeita malu, atu nune’e bele hamenus kazu violénsia doméstika iha Covalima.(*)
