Tempotimor (Covalima)-Tuir Adjuntu Adminitradór Munisipiu Covalima, Afonso Nugeira Nahack katak, Tour de Falintíl Forsa Defeza Timor-Leste (F-FDTL) ho tema Dalan ba Dame, sei selebra iha kampu ladi munisípiu Covalima, tanba ne’e Komisaun Organizadora prepara ona hodi simu Tanenti Jenerál F-FDTL, Lere Anan Timur.
“ita-nia Tanenti Jenerál Lere Anan Timur ho nia ekipa aban tuku 8 sira mai husi Munisipiu Bobonaru, ne’ebé ita simu iha auto-estrada suku Ogues, postu administrativu Maucatar depois ba tiha aldeia Tali-Oan, maka la’o ba parte Suailoro, depois ba Kamanasa, Fatu-isin hodi loke Plaka iha Kamanasa, ne’ebé akontesimentu Falintíl ho F-FDTL nian, depois mai Kampu Ladi,” dehan Adjuntu adminstradór ne’e ba média sira iha Kampu Ladi, Kinta (26/08).
Adjuntu ne’e husu ba komunidade sira iha postu Suai Villa atu partisipa loron importante ne’e, tamba kada postu partisipa ema na’in sanulu.
“Husu ba komunidade sira ne’ebé hela iha postu Suai Villa tenke mai partisipa hodi rona ita-nia Tanenti Jenerál Lere Anan Timur nia diskursu ne’ebé sei ko’alia kona-ba “Dalan ba Dame” atu hametin ita-nia dame ba seguransa no kontribui dezemvolvimentu iha munisípiu Covalima, tanba sira husi postu administrativu hitu kada postu ida ema na’in sanulu mak ami partisipa,” katak nia.
Entertantu selebrasaun Tour F-FDTL iha munisípiu Covalima ne’e sei hala’o mós atividade sira hanesan futu-manu, tebe-tebe iha Kampu Ladi, depois sermónia ne’e Tour F-FDTL sei kontinua ba viajen ba munisípiu Ainaro.(*)
