Tempotimor (Ainaro)-Komunidade Aldeia Raimera, Suku Edi, postu administrativu Maubisse, Munisípiu Ainaro kontribui rasik osan kada uma-ka’in hodi aluga ekiuipamentus pezadu hodi ke’e estrada husi Maubisse ba aldeia Raimera ho kilómetru neen.
Tuir xefe Aldeia Raimera, Francisco da Costa katak, atividade ke’e estrada kilómetru neen ne’e hetan konkordánsia husi komunidade hotu iha Aldeia Raimera, tanba husi ukun aan to’o agora komunidade Raimera la asesu ba estrada.
“Kona ba estrada ne’e ha’u la’o ba ha’u-nia komunidade aldeia Raimera ho kontribuisaun ho neon ida laran ida, foti ami-nia osan kada uma-ka’in $20 no joven ajuda $10 dolar hodi tau hamutuk sai rihun $2.500, nune’e hodi selu ba eksa hodi loke estrada refere ne’ebé loron ida selu $500 dolar,” dehan Francisco ba www.tempotimor.com iha bainhira halo hela servisu, Kinta (26/08).
Iha fatin hanesan xefe juventude suku Edi, João Carlos Mendonça sente triste tanba Timor-Leste ukun aan tinan barak ona, maibé Aldeia Raimera la asesu ba estrada inklui aldeia seluk iha teritóriu nasionál.
“Nu’udar juventude sentre triste, tanba durante ne’e governu promete no promete hela de’it, to’o agora la realiza, entaun ami suporta ami-nia xefe aldeia hodi kontribuisaun osan hamutuk hodi aluga ekipamentus pezadu ne’ebé servisu dadaun,” nia tenik.
Xefe juventude ne’e mós rekomenda ba governu, atu ajuda ekipamentu pezadu hodi kontinua loke estrada refere to’o aldeia Raimera, tanba komunidade nia finanseiru hodi selu ekipamentus pezadu ne’ebé dadaun ne’e halo servisu laiha ona. Alende ne’e totál populasaun iha aldeia Raimera hamutuk 137.(*)
