MF ho Parseiru Dezenvolvimentu Hahú Diskute Reabilita Estrada Iha Covalima

Ministru Obras Publika (MOP), Salvador Pires. Foto Tempo Timor

Tempotimor (Covalima)-Relasiona ho diálogu ne’ebé xefe governu Taur Matan Ruak halo ho autoriedade lokál no komunitáriu inklui komunidade sira iha munisípiu Covalima, Ministru Obras Públika (MOP), Salvador Eugênio Soares dos Reis Pires informa ba povu Covalima katak, reabilitasaun ba estrada sira iha Covalima, tama ona ba faze diskusaun entre Timor-Leste ho parseiru dezenvolvimentu sira.

“Hakarak partilla planu sira ne’ebé ita atu halo dadauk ka trasa hela no balun ne’ebé ita konklui ona dezeñu ne’ebé ba estrada nasionál governu hanoin katak, ita-nia estrada rin nasionál ba munisípiu sira halo ligasaun ba dalan nasionál hanesan Maliana Oeleu liga ba Fatululik, Fatumea, Tilomar kuaze kilómetru 92.2 agora dadaun faze diskusaun entre Ministériu Finansas (MF) nomós parseiru dezenvolvimentu sira,” dehan Ministru Salvadór ba komunidade Covalima, Kuarta (11/01).

Read More

Governante ne’e dehan, governu presiza prepara uluk rekezitu fundu empréstimu hodi halo dezenu, aprezenta planu ne’ebé real, atu nune’e bele hetan fundu empréstimu bele halo konstrusaun ba estrada sira.

Nia mós salienta, estrada ne’ebé atu liha husi Covalima ba Ainaro, sei uza osan poupansa husi impréstimu atu finansia ba dezeñu.

“Ida fali tan mak estrada husi postu Zumalai liga ba Ainaro kuaze 21 kilometru, ita ko’alia hela uza osan popansa balun husi projetu impréstimu ida ne’e halo uluk dezeñu depois mak ita husu osan ba halo konstrusaun atu nune’e bele kompleta estrada liga Zumalai ba Ainaro. Kona-ba suku Beco, Postu Suai liga ba Lolotoe Munisipiu Bobonaro iha 26.7 kilometrus inklui ona lista fundus infraestrutura iha livru 3A, ne’e iha tinan kotuk KAFI aprova ona, foin atu hakat ba estudu ba tinan ida ne’e,” nia tenik.

Ministru ne’ebé mai husi Partidu Libertasaun Popular (PLP) ne’e afirma, atu kontroi estrada, presiza halo uluk estudu, atu nune’e investimentu ne’e iha kualidade.(*)

Related posts