Tempotimor (Covalima)-Relasiona ho desizaun Konsellu Ministru (KM) ne’ebé husu membru governu sira atu dezloka ba munisípiu sira hodi halo kampaña ba vasinasaun nian mak ekipa husi Ministériu Obras Públika (MOP) husu ba komunidade Covalima tenke simu vasina.
Tuir Ministru Salvadór Pires katak, prioridade governu nia foku mak oinsa sala povu husi pandemia Covid-19, tanba ne’e Primeiru-Ministru (PM) orienta membru governu hotu tun ba baze hodi enkoraza povu atu tuir vasina.
“Husu ita boot sira tenke Partisipa programa vasinasaun, tanba programa vasina bele hasa’e ita-nia imunidade no prevene aan husi moras Covid-19,” dehan MOP ba média sira iha Camanasa, Kinta (30/09).
Governante ne’e mós lori xefe governu nia naran husu povu atu konxiénsia simu vasina kontra Covid-19.
“Ha’u mai iha ne’e lori xefe governu nia naran, husu ita-boot sira tenke partisipa programa vasinasaun máximu, nune’e ita bele sai ona husi situasaun Covid-19 ne’e,” katak Nia.
Entertantu tuir relatóriu, ne’ebé www.tempotimor.com asesu husi Servisu Saúde Munisípiu Covalima (SSMC) hatudu katak, partisipasaun komunidade Covalima nian iha programa vasina atinji ona 69.5%, ho nune’e postu Zumalai 54.5%, Fatululik 93.4%, Fatumea 92.5% enkuantu postu Suai, Tilomar, Maucatar, no Fohorem hakat ona ba entre 53% no 54%.(*)
