Tempotimor (Covalima) Tuir xefe suku Holpilat, Emilio do Carmo ba jornalista www.tempotimor.com katak, komesa eleitu ba xefe suku iha tinan 2016 to’o agora laiha fasilidade suku nian hanesan komputadór, entaun tenke impresta viziñu nian Laptop hodi halo servisu suku nian no atende nesesidade komunidade nian.
“Ha’u eleitu iha 2016 nu’udar xefe suku Holpilat, maibé to’o agora laiha fasilidade hanesan kadeira no komputadór, komputadór ne’e importante, maibé husi 2016 mai to’o agora laiha komputadór, ne’ebé difikulta tebes ba ami, dala barak ami impresta viziñu ka familia sira-nian Laptop, hodi atende servisu komunidade sira-nian, liu-liu deklarasaun no servisu suku nian no seluk tan, tanba ha’u-nia laptop kondisaun todan ona, entaun labele halo servisu,” dehan xefe suku Holpilat ne’e ba www.tempotimor.com liuhusi via telefone, Segunda (30/08).
Ba kestaun fasilidade sira ne’e hato’o beibeik ona ba autoriedade munisipál inklui husu tulun ba sosiedade sivíl balun, maibé laiha resposta ida.
“Ha’u hato’o beibeik ona kona-ba ami-nia preokupasaun suku Holpilat nian ba autoridade munisípiu no postu sira, inklui Ministériu Administrasaun Estatál (MAE), maibé to’o agora laiha rezultadu, ne’ebe ha’u hanesan xefe suku triste tebes, tanba hato’o beibeik ona, nafatin la iha rezultadu, ami husu ne’e la’ós hodi halo servisu ba privadu, maibé hodi atende komunidade sira-nia preokupasaun no suku nian,” nia dehan.
Entertantu suku Holpilat, postu administrativu Maucatar, Munisípiu Covalima totál populasaun Rrihun 2.973 ne’ebé kompostu husi xefe familia 656.(*)
