Tempotimor (Covalima)-Sesta-feira (27/08/2021) ne’e Sekretáriu Estadu Ambiente (SEA) liuhusi Ajénsia Nasionál Lisensiamentu Ambientál (ANLA) fasilita formasaun ba emprezáriu lokál sira iha Munisípiu Covalima kona-ba mekanizmu oinsa na’in ba kompañia bele trata karta lisensiamentu ambientál.
Iha formasaun ne’e, Sekretáriu Ezekutivu ANLA, António Lelo hateten, molok implementa atividade ekonómiku tenke trata uluk lisensiamentu ambientál hodi halo estudu viabilidade, hafoin bele implementa aktividade sira.
“Iha formasaun ne’e ami esplika kona-ba métodu ho mekanizmu oinsa maka na’in ba projetu sira bele trata karta lisensia ambientál, tamba tuir dekretu Lei nú. 5/2011 ne’e katak, molok implementa atividade ekonómiku tenke trata uluk Karta lisensiamentu ambientál, tamba ne’e maka ami mai fó formasaun ba sira,” dehan Sekretáriu Ezekutivu ne’e ba www.tempotimor.com iha Suai, Sesta (27/08).
Fontes ne’e afirma, la’ós dekretu lei ne’e de’it, maibé iha tempu besik esbosu lei kona-ba taxa ambiente nian sei haruka ba Konsellu Ministru (KM) hodi hetan aprovasaun.
“Dadaun ne’e ambiente sei fó lisensa gratuita, iha tempo besik ami-nia esbosu lei kona-ba taxa ambientál ne’e sei haruka ba Konsellu Ministru hodi hetan aprovasaun, se KM aprova lei ida ne’e maka hanesan ohin ha’u dehan, ba sira ne’ebé halo atividades ekonómika laiha karta lisensa ambientál maka sira sei kona multa ” katak Nia.
Enkuantu iha Munisípiu Covalima tuir dadus provizóriu ba emprezáriu lokál sira ne’ebé hetan ona karta lisensiamentu ambientál hamutuk 14 ne’ebé kompostu husi kategoria A, B no C, maibé dadaun ne’e emprezáriu lokál iha Covalima hamutuk 25 maka sei iha prosesu atu hetan karta lisensiamentu husi governu.
Entretantu formasaun ne’e realiza iha Salaun Eskola Sekundária Jerál Públika (ESGP) Suai ne’ebé hetan partisipasaun máximu husi autoridade lokál sira, inklui emprezáriu lokál sira iha Covalima.(*)
