Tempotimor (Covalima)-Relasiona ho Serka Sanitária (SS) ne’ebé governu impoein iha munisípiu Covalima hodi limite movimentasaun komunidade nian husi munisípiu ba kapitál Dili, maka vendedór sira iha Covalima hahú hasa’e folin gazolina husi dolar $1.00 ba dollar $1.20 sentavus.
Tuir motorista Aniceito Moniz iha merkadu Suai katak, husi serka sanitária, afeta ba folin gazolina sa’e, entaun aqua boot antes ne’e $1.50 sentavus, maibé agora sa’e ona ba $2.00.
“Governu kontinua aplika serka sanitária iha munisípiu Covalima, mais la haree komunidade sira-nia kondisaun nesesidade loron loron nian, agora mina bensin folin sa’e maka’as, uluk aqua boot ne’e dolar $1.50 sentavus de’it, agora sa’e to’o dolar $2.00 no masa boot 25 litru ne’e uluk folin dolar $25.00 deit, sa’e to’o dolar $38.00, ne’ebé ami husu governu bainhira los mak atu hapara serka sanitária iha munisípiu Covalima,” dehan Aniceito ba jornalista www.tempotimor.com Kinta (09/09).
Nia mós husu ba governu liu-liu ministériu relevante atu haree folin nesesidade báziku iha merkadu Suai, tanba sasan sira folin komesa sa’e.
Iha sorin seluk vendedór Beatris de Jesus katak, gazolina folin sae tanba governu taka dalan atu viajem ba kapitál Dili.
“Ami hasa’e sasan folin tanba governu taka dalan ba ami atu hola bensin iha Dili, entau ami tenke hasa’e gazolina nia folin,” katak Beatris.
Entertantu sasan báziku sira ne’ebé iha merkadu Suai hahú folin sa’e mak hanesan gazolina, bimoli litru sa’e ba dolar $6,50 sentavus no fos kilograma 25 sa’e ba 12,50 sentavus, maibé sasan seluk foin kontinua normal.(*)
