Tempotimor (Covalima)-Bazeia ba despaxu Prezidente Komisaun Funsaun Públika (KFP) no. 7944/PCFP/2021 loron 5 Janeiru ne’ebé ko’alia kona-ba prosesu rekrutamentu konkursu internu ho selesaun pur-méritu ba kargu xefia sira iha administrasaun pública, mak ohin Administardór Munisípiu Covalima (AMC), Francisco de Andrade fó ona pose ba kargu xefia sira ne’ebé pasa ona iha selesaun sira ne’e.
Iha serimónia solene ne’e, administradór munisípiu Covalima husu ba xefe seksaun sira atu halo servisu didi’ak hanesan servidór ba povu no sai instrumentu estadu ne’ebé di’ak iha komunidade nia leet.
“Ohin tomada de pose ba xefe seksaun hamutuk 14 ne’ebé kompostu husi servisu xefe seksaun lokál no finansas, xefe seksaun dezenvolvimentu komunitária. Hanesan babain ha’u hatete, hala’o servisu tenke sai atan ba ita-nia povu, labele sai liurai, tenke servisu ho didi’ak sai servidór, sai instrumentu ida ne’ebé di’ak iha komunidade nia leet,” dehan Administradór Francisco ba media sira liuhusi nia diskursu iha salaun administrasaun Covalima, Sesta (17/09).
Iha momento hanesan, atual xefe seksaun Dezenvolvimentu Komunitáriu postu Maukatar, António Marçal Amaral katak, sei kumpri lei no. 3/2016 ne’ebé ko’alia kona-ba halo servisu relasaun di’ak ho komunidade sira no assume kargu ho responsabilidade tomak.
“Ha’u hanesan xefe seksaun Dezenvolvimentu Komunitariu iha postu Maucatar, ha’u prontu atu halo liga di’ak ho komunidade, tanba tuir dekretu lei no. 3/2016 iha artigu balu maka preve ona katak, tenke servisu iha relasaun di’ak ho komunidade hanesan Oan-ki’ak, idozus inklui ho buat seluuk ne’ebé ha’u sei halo ho responsabilidade no integridade ba ita-nia komunidade,” katak António.
Entretantu xefi seksaun sira ne’ebé hetan pose ne’e kada postu administrativu ida iha sefe seksaun rua ne’ebé ida kona-ba xefe seksaun lokál i finansas no xefe seksaun dezenvolvimentu comunitária. Entretantu partispa iha serimónia ne’e mai husi reprezentante Ministériu Administrasaun Estatál (MAE), Administradór postu administrativu diretores liña ministeriais sira iha munisípiu Covalima.(*)
