Tempotimor (Covalima)-Administradór Munisípiu Covalima (AMC), Fransisco de Andrade husu ba funsionáriu públiku iha munisípiu Covalima labele nonton youtube iha oras servisu.
“Husu ba funsionáriu sira iha munisípiu Covalima nomós funsionáriu sira ne’ebé ohin simu toma de pose, bainhira oras servisu labele nonton youtube no labele fuma iha liur, tenke kumpri oras servisu, ha’u hatete bei-beik para fó atensaun ba imi, nune’e ita hamutuk bele dezenvolve rai Covalima,” Hatete Administradór Fransisco ba média sira iha salaun administrasaun Covalima, hafoin fó pose ba xefe seksaun sira, Sesta (17/09).
Administradór ne’e mós encoraja ba funsionáriu sira katak, mantein hatudu displina no responsabilidade máximu ba komunidade sira iha ida-idak nia instituisaun.
“Ha’u haree funsionáriu balun oras servisu hare youtube no fuma sigaru iha liur, tanba ne’e nafatin fó atensaun ba ita-boot sira katak, tenke hatudu disiplina bainhira oras servisu nian nomós tenke iha responsabilidade ba knaar ne’ebé ita hola parte,” Haktenik nia.(*)
