Tempotimor (Covalima)-Tuir negosiante Domingos Amaral iha nia servisu fatin Suailoron, nu’udar negosiante ba katupa no ikan iha tasi ibun Suailoron sente triste tanba husi 2020 to’o agora menus rendimentu tanba Covid-19.
Negosiante ne’e ba jornalista www.tempotimor.com katak, komunidade ka vizitante sira menus ba halimar iha tasi ibun Suailoro tanba Covid-19, nune’e afeta ba aihan sira ne’ebé vendedór sira propara.
“Komesa Covid mosu iha Timor-Leste ne’e laiha movimentu, entaun ema la mai tasi, ne’ebé ami-nia katupa ho ikan ne’e ema la hola ka mai han iha ne’e, entaun ami na’in mak han fali, entaun agora rendimentu susar loos. Kompara ho uluk dalaruma loron ida ami bele hetan to’o dolar $100.00, maibé agora hetan dolar $10.00 susar,” katak Domingus ba www.tempotimor.com, Sábadu (18/09).
Negosiante ne’e mós husu ba ministériu relevante atu haree komunidade negosiante sira-nia preokupasaun tanba atividade refere para ona tinan ida resin.
“Ami-nia atividade la’o la normal, ne’ebé husu ba nai ulun sira iha se bele haree no rona mós ami vendedór sira-nia halerik ida ne’e, tanba ami hodi atividades ne’e mak lori oan sira eskola no uza ba nesesidade lor-loron, maibé tempu hanesan ami difisíl atu hetan osan,” Haktenik Domingos.
Iha sorin seluk Juliana Barreto mós dehan, durante Covid-19 negosiante sira iha tasi Suailoro la hetan osan.
“Ami durante ne’e la hetan osan, tanba ema laiha atu mai tasi ibun, Entaun ami nia hahan mós la folin, ne’ebé ami triste tebes,” tenik Juliana.
Entertantu observasau www.tempotimor.com iha terenu nota katak, durante oras haat nia laran, laiha vizitante ida mak vizita tasi ibun Suailoro.(*)
