Tempotimor (Covalima)-Bazeia ba mandatu Komite Jestaun Merkadu Suai (KJMS) ne’ebé remata ona iha tinan kotuk, maka Servisu Munisipál Jestaun Merkadu no Turizmu (SMJMT) munisípiu Covalima hamutuk ho vendedór sira iha merkadu Suai prepara ona hodi halo realiza elisaun no re-estruturasaun ba mandatu foun.
Tuir Diretór SMJMT munisípiu Covalima, Damião Amaral katak, ekipa halo ona preparasaun nune’e alerta ba negosiante sira atu prepara pakote hodi bele kompete iha eleisaun ne’ebé realiza iha kuarta semana ne’e.
“Ohin ne’e enkontru regular ida ho ita-nia vendedór sira iha merkadu Suai, hodi haree ba jestaun merkadu nian, atu nune’e oinsa maka merkadu ne’e bele iha jestaun ne’ebé di’ak, ita iha komite jestaun merkadu, maibé sira mandatu remata ona, nebe bainrua maka sei halo eleisaun ne’ebé horsida ami sei halo avizu ba sira para sira bele prepara sira-nia pakote,” dehan Damião ba www.tempotimor.com iha nia knaar fatin, Segunda (20/09).
Damião afirma ba ekipa komite jestaun merkadu Suai, sei partisipa másimu husi negosiante sira, tanba sira mak harii rasik pakote hodi kompete.
“Eleisaun ne’e sei realiza iha merkadu Suai, ohin hameno ona ita-nia vendedór sira katak, tenke partisipa maximu iha eleisaun ne’e,” nia tenik.
Entertantu mandatu ba Komite Jestaun Merkadu Suai durante tinan rua, bainhira hetan fiar husi negosiante seluk hodi tau matan ba merkadu refere husi ambiente ne’ebé saudavél.
Observasaun www.tempotimor.com iha terenu nota katak, negosiante sira hahú halibur malu kada grupu hodi forma ekipa para kompete iha eleisaun refere.(*)
