Tempotimor (Covalima)-Relasiona ho eleisaun ba Komite Jestaun Merkadu Suai (KJMS) ne’ebe realiza iha merkadu Suai iha semana kotuk, maka negosiante sira fó fiar ba Mafalda Cardoso da Costa ho ekipa hodi lidera merkadu Suai ba período tinan rua.
Tuir xefe merkadu Suai, Mafalda Cardoso da Costa katak, estrutura anteriór la halo mudança ba merkadu Suai, tanba ne’e promete sei rezolve kondisaun merkadu Suai, atu nune’e oinsa merkadu refere bele iha ambiente moos.
“Ha’u hanesan Covalima oan kedas ha’u prontu hadi’a, tanba durante mandatu sira ne’ebé liu ona ne’e sira laiha mudansa, merkadu maka hanesan de’it, liu-liu lixu sira, entaun buat ne’ebé uluk sira la halo ne’eita tenke halo, merkadu ne’e tenke mos, estrada oin sira ne’e tenke mos beibeik,” dehan Mafalda iha Merkadu Suai, Horseik (27/09).
Nia akresenta, bainhira infrenta situasaun difisíl ruma prontu atu kopera ho autoridade postu Suai, hodi nune’e bele rezolve situasaun saida de’it maka Merkadu Suai infrenta.
“Sim, ha’u prontu atu koopera servisu ho autoridade munisípiu liu-liu autoridade iha postu Suai ne’e rasik, karik iha tempu ruma maka ha’u nia forsa la to’o karik, ha’u bele koopera ho sira hodi bele rezolve saida maka merkadu Suai ne’e hasoru,”Nia tenik.(*)
