Tempotimor (Covalima)-Ministériu Asuntu Kombatente Libertasaun Nasional (MAKLN), liuhosi Konsellu Kombatente Libertasaun Nasional (CCLN) iha Munisipiu Covalima, husu ba kandidatura hamutuk na’in 406 ne’ebé rejista iha tinan 2009, atu lalika tauk konta istória kona-ba sira partisipasaun iha istória luta libertasaun nasional Timor-Leste.
“Ha’u husu ba kandidatura atus ha’at ne’en (406) labele tauk atu koalia saida mak imi halo no sa ida mak fó ho bazeia ba lalaok ne’ebe mak ita bo’ot sira hala’o, tenke brani koalia bainhira ita nia maun sira husu”, hatate Reprezentante CCLN Covalima, Joaquin Barros “Sikat- Le’et”, iha Sede Suku Zulo Postu Administrativo Zumalai, kinta (30/09).
Asuntu ne’e, veteranu “Sikak-Le’et” hato’o, durante halo abertura ba verifikasaun dadus veteranu sira nian ne’ebé rejístadu iha tinan 2009 nian ba kotuk, iha Sede Suku Zulo.
“Depois ida tan mak h’au atu dehan ba imi, bainhira ita nia maun sira fila husi fatin ne’e mak foin koalia barak ha’u halo hanesan ne’e, ne’ebé saida mak ita bo’ot sira halo iha ‘tempu funu’ oras ida hateten sai”, dezafia nia.
Iha sorin seluk reprezentante Forsa Armada Libertasaun Nasional Timor-Leste (FALINTIL), hosi rejiaun IV, Asistente Polítika Milítar Atual, no Prezidente CCLN Munisipiu Ainaro, Julio da Conceicao “Loro mesak”, husu mós ba kandidatura sira iha Suku Zulo atu labele tauk atu konta sira nia istoria Funu nian.
“Husu ha’u nia inan no alin feto nomós maun-alin sira hotu labele moe atu konta saida mak Milítar Indonézia sira halo ba ita, tanba ita bo’ot sira mak hatene imi nia istória. Sé ita bo’ot sira na’in la konta entaun, halo nusá mak ami bele hatene. Tenke konta sai no lalika subar mai ami, atu hatene kona-ba akontesimentu iha momentu ne’ebá”, Loro mesak fó hanoin.
Tuir dadus veteranu iha Munisipiu Covalima ne’ebé rejístadu iha 2009, ho totál kandidatura hamutuk 9,962.
Maibé, dadaun ne’e, ekipa verifikadór sira foin mak verifika to’o Postu Administrativu Fatululik, Fatumea, Tilomar ho Fohorem, ho totál kandidatura hamutuk 2,545.(*)
