Tempotimor (Covalima)-Komunidade sira iha Suku Camenasa, Postu Administrativu Suai, Munisipiu Covalima, to’o oras ne’e sei preukupa hela ho efeitu hosi vasina COVID-19 nian ba inan isin-rua sira ne’ebé simu ona vasina, inklui mós sira seluk ne’ebé prepara aan hela atu vasina.
Preukupasaun ne’e, komunidade sira hato’o direta ba Ministru Obras Públikas (MOP), Salvadór Pires dos Reis, durante halo kampaña nasional kona-ba programa vasina COVID-19 ba komunidade sira iha Sede Suku Camenasa.
“Ha’u atu husu ba saúde sira, oinsalá ho ami ne’ebé kondisaun isin rua no bebe ne’ebe mak sei susu hela ne’e bele simu ba vasina ka lae, no karik ami simu vasina fó impatu ba bebe ka lae”, preukupa Inan-feton Juliana, iha Sede Suku Camenasa, kinta (30/09).
Iha fatin hanesan, Simplisio Amaral, nuudár komunidade iha suku ne’ebá, haktuir katak, durante ne’e nia feto-foun rasik seidauk simu vasina, tanba nasionalidade hosi Indonézia.
“Ha’u preokupa tebes ba programa vasina ne’e, tanba durante ne’e fó sai katak atu prevene moras Covid-19 ne’e, tenke partisipa programa Vasinasaun hanesan mós ohin ita nia ministru hateten tenke simu vasina, nune’e bele dook husi moras ne’e. Maibe, tanba saida mak ha’u nia feto-foun ne’e atu ba simu vasina lakoi, ne’e tanba saida”, nia preukupa.
Ba kestaun ne’e, Ministru Obras Públikas (MOP), Salvadór Pires dos Reis hatán, vasina ne’ebé governu oferese, la haree ba ema nia nia nasionalidade, maibe sidadaun sé de’it mak hela iha territóriu Timor-Leste, iha dereitu no obrigasaun atu simu vasina, hodi prevene aan surtu hosi COVID-19.
“Programa Vasina ne’e sei fó ba sé de’it, inklui inan isin-rua sira no ne’ebé fó susu hela inklui sidadaun nasional ne’ebé agora dadaun hela iha rai ida ne’e. Ne’ebé ba sé de’it mak atu simu vasina, la taka dalan ba ita bo’ot sira”, afirma nia.
Tuir planu, kampaña nasional ba programa vasina COVID-19 ne’e, MOP Salvadór sei kontinua kobre ba to’o suku Labarai ho Beco, iha Postu Administrativu Suai, Munisipiu Covalima.(*)
