Tempotimor (Covalima)-Sesta-feira (22/10/2021) ne’e vise Ministru Edukasaun Juventude no Desportu (MEJD), António Guterres ensera ona kampaña vasinasaun iha Postu Administrativu Zumalai, munisípiu Covalima.
“Ohin ha’u deside hodi mai vizita eskola iha ne’e no realiza kampañã vasinasaun, tanba aban ha’u fila ona ba Díli, ha’u iha ne’e besik semana tolu ona hamutuk ho povu Suai atu tulun hodi halo prevensaun ba COVID-19,” katak Vise MEJD António liuhusi diskursu ba enseramentu kampaña vasinasaun intensivu, Sesta (22/10).
Governante ne’e dehan, “Ita halibur malu iha ne’e tanba ita-nia domin ba malu no ita hakarak kuidadu malu hosi moras COVID-19,” Nia informa.
Agradese ba lideransa komunitária sira, ne’ebé durante ne’e hamutuk hodi disemina informasaun kona-ba importánsia husi vasinasaun.
Iha sorin seluk, Sekretáriu Administradór Munisípiu Covalima, Francisco Alves agradese ba Vise MEJD nia prezensa iha Covalima, tanba taxa kobertura vasinasaun Covalima iha nível nasionál okupa primeiru lugar.
“Ita hatene sira-nia prezensa iha ne’e ho sira-nia misaun atu realiza kampaña vasinasaun hodi kombate moras COVID-19, tanba ita-nia inan-aman sira rona informasaun falsu iha liur katak vasina ladi’ak,” Nia hatete.
Nia afirma, molok membru governu mai Covalima taxa kobertura vasinasaun foin atinji 60%, maibé ohin Covalima nia taxa kobertura vasinasaun okupa primeiru lugar iha nível nasionál ho pursentu 85,7%.
Entretantu membru governu ne’ebé responsável ba kampaña vasinasaun iha munisípiu Covalima mak hanesan Vise Ministru Edukasaun Juventude no Desportu (MEJD), António Guterres ne’ebé responsável ba postu Fohorem ho Maucatar, Vise Ministru Interiór (Vise-MI), António Armindo responsável ba postu Fatululik, Fatumea no Tilomar no Ministru Obras Públika (MOP), Salvadór Pires responsável ba postu Suai Vila no Zumalai.
Alende ne’e observasaun www.tempotimor.com iha terenu nota katak, vise MEJD nia prezenta iha Covalima konsege la’o to’o aldeia sira ne’ebé rurál liu hodi halo esplikasaun ba komunidade sira kona-ba importánsia husi vasina.(*)
