Deskonfia ‘Otonomista’ Balun Sai Kandidatura ba Veteranu

Konsellu Veteranu Munisipiu Covalima iha hela serimonia solene kona-ba juramentu nu'udar veteranu ne'ebe luta ba libertasaun nasional. Kinta (30/09). Foto Tempo Timor

Tempotimor (Covalima)-Tuir xefe ekipa verifikasaun dadus veteranus iha Munisípiu Covalima, Fancisco Doutel Sarmento “La Mesak” katak, verifikasaun dadus veteranu ba tinan 2009 nian, veteranus barak la partisipa iha juramentu ba Bandeira RDTL no FALINTIL tanba tauk mate.

“Ami kuandu halo juramentu sira la mai, entaun ema ne’e otonomista nia ema, depois sira la mai tanba tauk mate, tanba juramentu ba Bandeira RDTL no FALINTIL, iha postu ne’e hanesan lulik boot, entaun sira tauk barak maka lai mai, Husi primeiru registu ne’e sira mai tau naran, maibé agora atu halo juramentu la mosu, tanba tauk, ne’ebe juramentu ne’e la’ós buat halimar,” dehan La Mesak suku Zulo, Postu Zumalai ohin (30/09).

Read More

La Mesak afirma, veteranu ne’ebé falsifika dokumentus hodi hetan grau 8 a 14, konsekuénsia sei hatán iha tribunal.

“Sira ne’ebé falsifika dokumentu ba ema ne’ebé uluk la servisu mas agora nia tur iha oitu a katorze (8 a 14) sira konsekuénsia ba hatán iha tribunal, tanba tribunal mak bele hakotu,” Nia dehan.

Iha fatin hanesan reprezentante FALINTIL Rejiaun IV, Asistente Polítika Militar, atuál Presidente Konsellu Veteranus Munisipiu Ainaru, Julio da Conceição “Loro Mesak” katak, tempu uluk ema barak la gosta FRETILIN, maibé iha tempu ukun aan ema hirak ne’e sai ona veteranus ho grau 8 a 14.

“Uluk imi servisu ho ha’u tempu barak iha Covalima, maibé uluk balun la gosta tan FRETILIN, soke tan ha’u depois hatete ba ema katak ha’u soke FRETILIN nia ema, maibe uluk la gosta FRETILIN sira ne’e, agora Fretilin manan sira mós veteranus hotu ne’e komik,” dehan Loro Mesak.

Loro Mesak mós husu ba responsável sira atu esplika tanba sa defende ema ne’ebe uluk la gosta FRETILIN no lakohi ukun aan, maibé hetan grau 8 a 14.

“Uluk ema la gosta Fretilin no lakohi ukun aan, maibé agora ne’e sai veteranus 8 a 14, husu responsavel sira tanba saida maka defende ema ne’e bele sai hanesan ne’e, imi tenke hatene no esplika rajaun tanba saida?,” Nia tenik.

Entertantu ema ne’ebé molok ne’e tau naran hamutuk 33, maibé tempu atu halo juramentu sira tauk no la marka prezensa, tanba tauk mate.(*)

Related posts