Tempotimor (Covalima)-Tersa-feira (05/10) ohin, Komisaun Jestaun Risku Dezastre munisípiu Covalima hala’o sensiblizasaun ba autoridade lokal no doretores sira iha Covalima, hodi kona-ba preparasaun fatin dezastre naturais.
Diretór KJRDM, Quintino Amaral katak, objetivu ba enkontru ne’e hodi tau planu ba fatin dezastre naturais antes akontese laniña, maibé iha ona fatin propriodades hodi evakua komunidade sira kuandu laniña mosu no afeta ba komunidade sira.
“Enkontru ne’e buka hatene loloos rekursu ne’ebé munisípiu ne’e iha, liu-liu KJRDM Covalima hodi nune’e bele prepara di’ak liután, nune’e identifika rekursu umanitáriu no haree ona ba dezastre naturais, para fasilita fatin ka sentru evakuasaun, tanba iha Covalima sentru evakuasaun ida deit, entaun molok laniña akontese tan, ita iha ona fatin própriu hodi muda ita-nia kounidade afetadu sira,” dehan Diretór KJRDM, Quintino iha salaun MSSI munisípiu Covalima. Tersa (05/10).
Nia mós garante katak, maske funsionáriu KJRDM iha funsionáriu oituan de’it, maibé garante no bele responde enkuntu mosu tan inundasaun hodi afeta ba komunidade sira.
“Ko’alia kona-ba rekursu umanu KJRDM iha funsionáriu volume ki’ik, maibé naton atu responde tanba ita iha parseiru lider komunitária no diresaun sira ne’ebé servisu iha área dezastre naturais ne’e suporta. Nune’e ita bele responde ba komunidade sira ne’ebé hetan dezastre naturais,” tenik Quintino.
Iha fatin hanesan sekretáriu administrasaun munisípiu Covalima, Afonso Nogueira Nahack husu ba autoridade suku no postu sira atu toma atensaun ba komunidade sira ne’ebé hela iha zona risku.
“Ita mai hamutuk iha ne’e hodi ko’alia kona-ba ita-nia komunidade sira ne’ebé hetan dezastre naturais, tanba ne’e ha’u husu ba autoridade suku no postu inklui iha munisípiu atu toma atensaun ba ita boot sira-nia komunidade labele husik sira sofre mesak ba dezastre,” dehan Afonso.
Entretantu, enkontru refere sei kontinua ba etapa daruak atu nune’e bele identifika familia hirak mak afeta no sei afeta tan ba dezastre naturais.(*)
