Tempotimor (Covalima)-Bazeia ba desizaun governu ne’ebé molok to’o 25 Dezembru 2021 hakarak fila ba situasaun normal, maka Konsellu Ministru (KM) deside hodi membru governu sira tun ba baze hodi husu komunidade sira atu simu vasina kontra Covid-19.
Bazeia ba desizaun ne’e, vise Ministru Edukasaun Juventude no Desportu (MEJD), António Guterres husu ba komunidade Fohorem atu labele fiar hoax iha média sosiál kona-ba efeitu vasina nian, maibé fiar de’it ba governu no saúde kona-ba vasina refere.
“Durante ne’e hala’o kampaña vasinasaun kontra covid-19 ne’ebé ha’u simu responsável ba postu Maucatar ho Fohorem, enjeral postu rua ne’e di’ak hotu, maibé postu Fohorem partisipasaun komunidade iha programa vasinasaun sei menus só suku Lactos maka pursentu boot,” ona, dehan vise-MEJD, António ba jornalista sira iha Fohorem, Tersa (05/10).
Liga ba númeru vasina iha Fohorem ne’ebé sei menus, maka governante ne’e promete sei realiza enkontru ho autoriedade lokál, veteranu, profesór no komunidade sira iha kinta bainrua,” nia dehan.
“Dia 07 semana ne’e hau sei halo reuniaun ho lider komunitariu, komunidade, profesór no veteranu sira iha ne’ebá, oinsa bele desimina fila fali ba entidades sira oinsa bele koopera malu atu nune’e komunidade sira bele hola parte iha vasina ida ne’e,” Nia subliña.
Iha tempu hanesan, nia mós husu ba komunidade sira atu labele fiar ba informasaun falsu husi média sosiál.
“Ha’u husu ba komunidade enjeral iha Covalima, husu atu labele fiar informasaun falsu sira ne’e, tenke fiar ba ita-nia governu, ne’ebé ha’u apela ba komunidade sira tenke kontribui ba programa vasinasaun tanba ida ne’e di’ak ba ita-nia saúde,” nia tenik.
Entretantu tuir dadus husi nasionál ne’ebe vise Ministru Edukasaun Juventude no Desportu (MEJD), António Guterres fó sai ba komunidade Fohorem no Maucatar katak, munisípiu Covalima hanesan segundu lugar ba programa vasinasaun ne’ebé atinje ona 70%.(*)
