Projeitu UKL Iha Covalima Foin Atinje 18,30%

Tempotimor (Covalima)-Diretór Programa Nasionál ba Dezenvolvimentu Suku (PNDS), Munisipiu Covalima, Filipe Cardoso Vieira katak, konstrusaun Uma ba Kbi’it Laek (UKL) iha Covalima jeralmente foin atinje 18, 30%.

“Konstrusaun UKL ba família vulnerável ne’ebé PNDS implementa iha suku 30, postu administrativu hitu iha munisípiu Covalima, ita halo separasaun kada postu ho komulativu foin atinje 18,30%” dehan Diretór PNDS, Filipe ba jornalista iha nia knaar fatin, Horseik (12/10).

Read More

Nia afirma, konstrusaun iha postu Fatululik hamutuk unidade neen ne’ebé atinje ona 37.60%, postu Zumalai unidade 24 atinje ona 27.3%, postu Suai iha unidade 15 atinje ona 5.69%, postu Tilomar iha unidade 12 atinje ona 26.68%, postu Maucatar iha unidade 12 atinji 7% no postu Fohorem unidade 12 ne’ebé atinje ona 22.11%. Maibé postu administrativu Fatumea mak seidauk hahú konstrusaun ba UKL, tanba molok ne’e postu refere aplika hela serka sanitária.

Nia komenta, munisípiu Covalima programa PNDS konstrui UKL hamutuk unidade 90 ne’ebé pursentu kumulativu foin atinji 18.38%, tanba kondisaun estrada.

“Dezafiu ne’ebé PNDS hasoru durante konstrui UKL maka estrada, tanba ne’e sekretária tékniku PNDS nasionál hala’o ona koordenasaun ho Institutu Jestaun no Ekipamentus (IJE), atu nune’e apoiu ka fasilita loke estrada, tanba PNDS komesa servisu hamutuk ho komunidade sira hodi hadi’a estrada sira ne’ebé sente risku,” katak Nia.

Nia hatutan, maske hasoru difikuldade estrada aat, maibé ekipa kontinua implementa UKL, tanba orsamentu alokadu ona no benefisiáriu elizivel sira mós identifkadu no aprova ona. Entretantu UKL ne’ebé hala’o ih Covalima hamutuk unidade 90 ne’ebé ho totál orsamentu $1.491,000.00.(*)

Related posts