Tempotimor (Covalima)-Tuir Vise Ministru Edukasaun Juventude no Desportu (MEJD), António Guterres katak, profesór na’in rua husi Eskola Bázika Filiál (EBF) Lorokida lamenta tebes, tanba tinan sanulu ona manorin sira liu na’in 30 iha Covalima la haten direitu ba subsídiu área remotas nian.
Kestaun ne’e, Vise MEJD kontaktu kedas liuhusi via telefone ba Diretór Jerál Edukasaun Nasional (DJEN) husi MEJD nian iha Dili inklui konfirma ho Diretór Edukasaun Munisípiu Covalima (EMC), Edmundo Perreira kona-ba lamentasaun sira ne’ebé aprezenta husi profesór área remotas nian.
“Iha problema balun sira kestiona kona-ba sira-nia direitu ba subsídiu remotas, tanba balun tinan sanulu no balun tinan sia ona la hetan, ne’ebé ita sei resolve tuir lei ne’ebé iha no ohin ha’u mós halo kedas koordenasaun ho rekursu umanu MEJD nian nomós ha’u ko’alia kedas ho Diretór Edukasuan Munisípiu, tanba iha Covalima profesór na’in 30-resin mak seidauk hetan sira-nia direitu subsídiu ba área remotas nian, ne’ebé keta halimar, tanba ne’e sira-nia direitu,” Hateten Vise MEJD Antonio Guterres iha EBF Lorokida, Ohin (19/10).
Pronlema ne’e Diretór EMC, Edmundo Perreira mós subliña, durante iha mandatu hato’o proposta bei-beik ba nasionál, maibé laiha resposta to’o agora.
“Ami kraik ne’e hato’o proposta ba dala rua ka tolu, tau mós eskola nia naran ba dokumentu ne’e, entaun ami hatama kedas iha tinan kotuk liubá, tanba profesór balun tinan sanulu ona, maibé ha’u mai iha 2016 agora iha ha’u nia tempu prosesu ba diresaun nasionál, maibé to’o agora laiha responde,” nia dehan.(*)
