Tempotimor (Covalima)-Volume estudante ne’ebé boot iha Eskola Sekundária Jerál uábliku (ESGP) Suai Seran kotek, mak adjuntu diretor ESJP, Rui Lemos husu ba Ministériu Edukasaun Juventude no Desportu (MEJD) atu loke tan filial ba ESJP iha Covalima.
“Ami nia ezijénsia ba señor Vise Ministru Edukasaun Juventude no Desportu (vise-MEJD), António Guterres se bele loke tan liras husi ESJP Suai nune’e bele sai ESJP 1 no ESJP 2, tanba alunus 649 mak uza hela Eskola EBC Ladi nia fatin to’o agora,” Hateten Rui Lemos ba jornalista sira iha ESJP Suai, Ohin (20/10).
Iha ESJP Suai, manorin sira sufisiente ona hodi hanorin estudante sira, maibé sala-de-aula mak la to’o, tanba númeru estudante boot.
“Ami estuda no observa tiha ona kona-ba rekursu umanu, sufisiente hela hodi koloka ba ensinu pre-sekunadariu nível 1 no nível 2, tanba ami professor permanente hamutuk 16, parte tempu na’in neen no kontratadu na’in lima, ne’ebe ami sente sufisiénte hela, tanba ne’e ami husu nusa mak Vise ministru la loke tan liras ida husi ESJP ne’e,” katak Adjuntu ESJP Suai.
Hatán ba preokupasaun ne’e Vise MEJD, António Guterres la promete, maibé sei haree kona-ba preokupasaun husi eskola sekundária jerál públika Suai nian molok hola desizaun.
“Husu ita-boot sira fó tempu oituan ba há’u no Ministru Edukasaun, tanba ami foni mai iha tinan 2020 ne’e, maibé di’ak há’u sei haree kona-ba lamentasaun ne’ebé ita-boot sira hato’o mai ha’u,” Vise MEJD dehan.(*)
