Tempotimor (Covalima)-Servisu Munisipal Protesaun Sivíl Jestaun Dezastre Naturais (SMPSJDN) komemora loron Dezastre Naturais iha postu administrativu Maucatar, Munisípiu Covalima ho atividade kuda Ai-Kakeu ho Ai-Samatuku hamutuk 75 hodi prevene erozaun iha postu Maucatar.
Diretór SMPSJDN iha Covalima, Quintino da Costa katak, kuda ai-oan ne’e atu hametin rai ne’ebé sempre mosu erozaun hosi fó ameasa ba dormitoriu madre sira-nian iha postu Maucatar.
“Ohin ita komemora loron dezastre naturais iha munisípiu Covalima ho objetivu atu hamatak fali ai ne’ebé mate, no hametin fali rai ne’ebé maka halai, tanba ne’e maka ohin kuda ai-kakeu ho ai-samatuku hamutuk 75,” dehan Quintino ba jornalista sira, Segunda (25/10).
Iha fatin hanesan diretór agrikultora munisípiu Covalima, Zeferino……haktuir, ai-oan sira ne’e prepara husi servisu agrikultór munisípiu Covalima liuhusi Departamentu Floresta.
“Ai-oan hirak ne’e prepara husi Servisu Munisipal liuhusi Departamentu Floresta hodi prevene rai halai, tanba ne’e bainhira udan tun ita sei koloka tan ai-oan mai iha ne’e hodi kuda iha fatin ne’ebé mamuk,” nia tenik.
Alende ne’e, Administradór Munisípiu Covalima, Francisco de Andrade husu ba komunidade no estudante inklui madre sira atu proteje ai-oan hirak ne’ebé ekipa kuda ona, atu nune’e bele hametin fali rai ne’ebé halai.
“Ha’u-nia mensajem ba imi hotu maka iha ne’e, imi tenke kuidadu ai ne’ebé ohin ita kuda ne’e, para oinsa maka bele hametin fali rai halai ne’ebá ne’e, imi rasik maka la kuidadu entaun hanesan de’it, ne’ebé ha’u agradese ba madre sira, tanba akontese hansan ne’e sira mós hato’o lalais,” katak Administradór.
Entertantu komemorasaun loron dezastre naturais hodi kuda ai-oan 75 iha postu Maucatar ne’e partisipa husi administradór munisípiu Covalima, Diretór Solidariedade Sosial Inkluzaun iha Covalima, Koordenadór CVTL filial Covalima, Reprezentante ONG Mercy Corps, Diretór Seguransa ba Ai-han, Madre sira iha Dormitoriu postu Maucatar inklui estudante no Komunidade iha postu refere.(*)
