Vise MJ Sensibiliza Lei Rejime Espesial ba Komunidade Ogues

Vise MInistru Justisa, Jose Edmundo Caetano sensibiliza hela lei rejime espesial ba komunidade suku Ogues, Munisipiu Covalima, Segunda (25/10). Foto Tempo Timor

Tempotimor (Covalima)-Vise Ministru Justisa (Vise-MJ), José Edmundo Caetano halo sensibiliza lei nú. 13/2017 kona-ba rejime espesial ne’ebé define titularidade bem imovel inklui lei nú. 8/2017 kona-ba espropriasaun ba utilidade públika no lei nú. 9/2002 kona-ba nasionalidade ba komunidade Ogues.

José dehan, ministériu justisa sosializa lei sira ne’e, tanba komunidade sira seidauk iha koñesimentu kona-ba lei sira ne’e nomós oinsa sidadaun sira bele hetan dokumentu legalidade no sai na’in ba rai.

Read More

“Ita nia sosiedade seidauk iha konesimentu ba lei rejime jurídiku ba vensimentu moveis kona-ba rai nomós lei nasionalidade nian, tanba ne’e ohin ami fahe informasaun kona-ba lei ne’e ba ita nia komunidade sira iha suku Ogues, tanba ita hatene katak lei ne’e iha funsaun atu kontrola ba sosiedade sira, nune’e sosiedade sira tenke iha koñesimentu hodi kria establidade no pas iha ita-nia rai,” Hateten Vise MJ ba jornalista sira iha sede suku Ogues, Segunda (25/10).

Liga ba lei nasionalidade, mak sidadaun estranjeiru ne’ebé kaben ho Timoroan, tenke prienxe rekezitus hodi sai sidadaun Timor inklui aprende lian Tetun no Portuges.

“Ba nasionalidade, ita-nia sidadaun Timoroan ne’ebé kaben iha rai liur no kaben lori mai, sira mós hakarak sai Timoroan, maibé lei ne’e hateten tenke prienxe rekezitus legais no sai sidadaun Timor-Leste tenke husu tuir atu nune’e tuir prosedimentu ka tuir teste atu nune’e pasa bele sai sidadaun timoroan, se la passa nafatin, labele sai sidadaun Timor oan nomós tenke hatene lian Tetun no Portuges para tuir ezame bele passa, ba sira ne’ebé mak lahatene lee no hakerek tenke tuir ezame oral,” Katak José Caetano.

Momentu hanesan reprezentante Administradór Postu Administrativu Maucatar, Adriana da Costa dehan, Ministériu Justisa presiza haree kona-ba kaben ho sidadaun estranjéiru, tanba iha postu Maucatar iha problema barak kona-ba kestaun ne’e.

“Ohin loron atu ko’alia kona-ba lei kaben silan, okupa rai no rai abandonadu ka fronteira komunidade ida nian ho komunidade seluk nia rai. Agora ko’alia kona-ba kaben silan agora dadaun komunidade barak mak nia inan-aman no oan seidauk iha dokumentu sertidaun RDTL, Bilete Identidade no Kartau Eleitoral, entaun difisil atu asesu edukasaun no komunidade balun atu tuir ezame maibé problema finanseiru, tanba ne’e ami husu ba señor atu tau konsiderasan kona-ba ida ne’e nomós oinsa bele fó ezame para sira sai sidadaun Timoroan,” Nia tenik.

Entertantu observasaun www.tempotimor.com iha terrenu nota katak, iha sensibilizasaun kona-ba lei nú. 13/2017, nú. 8/2017 nú. 9/2002 ne’e hetan partisipante maximu husi komunidade suku Ogues,tanba kada aldeia ida ema nai ruanulu mak partisipa.(*)

Related posts