Duun Fekit Dom Basílio ba Covalima, AMC: Kondena Aitahan Matak

Deklarasaun Antonio Aitahan Matak nian iha facebook.

Tempotimor (Covalima)-Relasiona ho deklarasaun António Aitahan Matak ne’ebé alerta ba públiku iha média sosiál katak, matebian Fernando Lasama de Araújo no Dom Basílio do Nascimento Martins hetan fekit husi Covalima, mak autoriedade Covalima kondena no rejeita deklasaun refere.

Administradór Munisípiu Covalima (AMC) Francisco de Andrade lori povu Covalima husu veteranu António Aitahan Matak tenke hatudu ezemplu di’ak ba públiku no labele halo deklarasaun iha pájina facebook tuir hakarak.

Read More

“Ha’u nu’udar aman ida iha Munisípiu Covalima husu señor António Aitahan Matak tenke toma responsabilidade ba nia liafuan dehan ema Covalima mak halo ba Dom Basílio do Nascimento ho Saudosu Fernando Lasama de Araújo ne’e, ne’ebé ha’u kondena maka’as kona-ba Dom Basílio nian moras ne’ebé fó sai husi doutora espesilista sira katak, Dom Basílio moras fuan, so ida ne’e realidade, maibé fó sai husi Sr. António Aitahan Matak katak Covalima mak fekit, ne’ebé ha’u reprezenta povu Covalima husu nia, labele naran ko’alia arbiru hanesan ibun feto iha dapur laran, se veteranus ida tenke ko’alia hanesan veteranu,” dehan AMC Francisco ho lian maka’as iha nia knaar fatin, bainhira www.tempotimor.com konfirma kona-ba asuntu refere, Kinta (04/11).

Iha sorin seluk, vise Konsellu Veteranus Munisípiu Covalima (KVMC),  Osório Soares (Mausoko) lamenta tebes ho aktu António Aitahan Matak nia publikasaun husi facebook katak, Covalima mak oho Amu Bispu diosezee Baukau Dom Basílio do Nascimento Martins no Saudosu Fernando Lasama de Araújo.

“Husu ba señor Aitahan Matak ne’ebé fó sai katak, povu Covalima mak fekit ka oho Dom Basílio no Saudosu Fernando Lasama ne’e, ami  rejita total, tanba sa? Ne’e Sr. António hatene husi ne’ebé? Ne’ebé husu Aitahan Matak tau estatementu tenke hanoin didi’ak, sukat didi’ak, deskonfia ami Covalima mak oho Dom Basílio ne’e ami Covalima mak atu troka nia ka halo nusa, ne’e mak deskonfia ami mak oho ne’e, ne’ebé ami povu Covalima no autoridade lokál rejeita imformasaun ida ne’e, Se uluk ami atu oho António Aitahan Matak karik oho iha Asumaten  suku Debos iha tinan 1997 ne’ebá, Tanba ami  mak subar iha ha’u-nia uma fulan ida, ami fó han hemu iha ne’ebá, Depois ikus nia tau estatementu dehan Covalima mak fekit Dom Basílio do Nascimento no Saudosu Fernando Lasama,” Hateten Mausoko.

Alende ne’e, Silvester Ferreira nu’udar akademista triste tebes ho deklarasaun Aitahan Matak ne’ebé dehan Covalima mak oho Dom Basílio.

“Nia labele públika deklarasaun tuir nia hakarak, tanba nia la’ós ema médiku ida, ne’ebé laiha faktus ida naran duun Covalima de’it, ne’ebé husu ba veteranus António Aitahan Matak atu responsabliza ba nia estatementu ne’e no tenke husu deskulpa ba ema Covalima,” Katak nia.(*)

Related posts