Tempotimor (Kovalima) – Sentru Juventude Kovalima (CJC-sigla portugues) entrega ona orsamentu rihun U$19,250 ne’ebé Sekretáriu Estadu Juventude no Desportu (SEJD) apoiu ba grupu juventude hamutuk 26 husi Postu Administrativu 7 iha Munisípiu Kovalima.
Diretór SJK, Calistro Leite Gusmão, husu ba grupu sira ne’ebé hetan transferensia públiku husi Sekretáriu Estadu Juventude no Desportu (SEJD) tenke hatudu rezultadu.
“Husu ba grupu 26, tenke uza osan ne’e hatudu rezultadu, tanba orsamentu ne’e bot ne’ebé loron ida husi osan na’in sei mai haree grupu ne’ebé hetan apoiu ne’e, tanba ne’e, ita boot sira tenke hatudu rezultadu pozitivu ba ema osan na’in sira mai,” nia husu, tersa (16/11).
Iha sorin seluk Sekretariadu Administrasaun Munisípiu Kovalima, Frasisco de jesus Alves husu grupu sira ne’ebé hetan ona apoiu husi SJK no SEJD labele uza hanesan oportunidade, maibe ho responsablidade.
“Labele uza hanesan oportunidade, maibé uza hanesan responsablidade, nune’e bele ba oin kontinua tau konfiansa ba ita boot sira nia grupu no osan ne’e hodi apoiu ba imi nia atividade halo boot liu tan, nune’e balun uza hodi sustenta imi nia família uma laran,” Hateten nia
Reprezentante Grupu Haburas Unidade, Erna Wati, apresia tebes ba SJK nia programa emprededorizmu, tanba apoiu ona grupu ho montante osan U$750.00 dolár hodi bele hamoris sira nia grupu.
“Ami kontente tebes, tanba SJK liu husi SEJD apoiu ami grupu sira ne’ebé halo modo ho osan hirak ne’e bele hamoris grupu kuda modo mutin no Alfase, depois ami koilleta fa’an fali iha merkadu munisípiu, nune’e ami hetan osan ne’ebe sira apoiu ne’e labele mate,” dehan nia. (*)
SJK Sei Apoiu Orsamentu $19,250 ba Grupu 26 – Tempo Timor Suai
