Tempotimor (Kovalima)-Maske Timor-Leste ukun aan tinan 19 ona, maibé komunidade iha teritóriu Timor-Leste balun seidauk asesu liña internet inklui komunidade suku Ogues, postu Maucatar munisípiu Kovalima.
Tuir komunidade Aleixo Gusmão husi aldeia Baulela, Suku Ogues husu autoridade lokál no kompañia telekomunikasaun ne’ebé eziste iha Timor-Leste hanesan Timor Telekom, Telemor no Telkomsel atu instala rede komunikasaun no rede internet nian iha área Ogues.
“Ami husu ba ita-nia autoridade lokál sira halo karta ida took ba ita-nia parte kompañia Telemor, Telkomsel mo Timor Telekom atu mai halo survey iha ami nia suku Ogues ne’e para sira bele hatene, tanba tinan ruanulu resin ona ami seidauk asesu rede komunikasaun no rede internet, ami vijinu ho munisipiu Kovalima, Maibé ami mak la hetan fali rede internet,” Dehan Aleixo ba www.tempotimor.com iha aldeia Baulela, Sesta (19/11).
Iha sorin seluk estudante husi Eskola Sekundária Katólika Ave Maria Suai, Mateus Henriques sente triste tanba estudante iha suku Ogues labele asesu internet hanesan estudante seluk.
“Ami estudante sira ne’e difisil tebes atu asesu matéria iha página média sosiál, tanba rede internet laiha, ne’ebé ami husu ba kompañia Telemor no seluk sira bele instala ka harii torre ida iha área suku Ogues ne’e,” nia dehan.
Liga ba preokupasaun ne’e xefe suku Ogues, Faustino de Araújo hato’o ona ba ba kompañia Telemor, maibé kliente suku ogues la to’o targetu, tanba ne’e labele hari torre kona-ba komunikasaun.
“Ha’u hato’o ona ba kompañia Telemor iha fulan kotuk liubá, maibé husi kompañia Telemor dehan ba ha’u suku Ogues la to’o kliente tanba ne’e sira labele harii rin ka antena iha suku Ogues no kompañia seluk hanesan Timor Telekom no Telkomsel mak ha’u seidauk hasoru ka hato’o kona-ba ne’e, hanesan autoridade lokál kontinua esforsu hodi rezolve ne’e,” Nia hakotu.
Entretantu, tuir dadus ne’ebé www.tempotimor.com asesu katak, komunidade iha suku Ogues hamutuk rihun 3.104 mak seidauk asesu liña internet inklui liña komunikasaun husi operadór telekomunikasaun tolu ne’ebé eziste iha Timor-Leste.(*)
