Tempotimor (Kovalima)-Programa Monitorizasaun Sistema Jusidisiál (JSMP) Timor-Leste realiza semináriu regional kona-ba knaar orgaun soberanu, partisipasaun públiku iha prosessu halo lei no asessu ba justisa formal.
Diretora Ezekutivu JSMP, Ana Paula Marçal hatete, objetivu husi semináriu ne’e atu hasa’e koñesimentu komunidade nian oinsa bele hatene di’ak kona-ba asuntu demokrásia no asessu ba justisa.
“Ita presiza hasa’e ita-nia koñesimentu kona-ba saida maka demokrásia no asessu ba justisa ne’e oinsa, depois preokupasaun saida maka sira hasoru iha sira-nia moris, ne’ebé dadaun sira atu hasoru autór tribunal nian hanesan prokuradór jerál ne’e para sira husu direta ba sira karik hasoru kazu ruma maka sira dúvida entaun sira husu direta hodi hatene,” dehan Ana Paula iha salaun edifísiu IADE munisípiu Kovalima, Kinta (18/11).
Administradór munisípiu Kovalima, Francisco de Andrade husu ba partisipante sira atu husu oradór sira karik mosu dúvida, nune’e bele hatene kle’an kona-ba direitu no demokrásia.
“Ha’u husu ba partisipantes hotu karik iha duvidas ruma tenke husu, tanba iha ne’e ita-nia orador husi juis ho JSMP mós iha, ne’ebé tenke husu para hatene kona-ba saida maka direitu ho demokrásia, tanba dadauk ne’e funsionáriu balun ejizi sira-nia direitu maibé dever la hala’o,” katak Administradór.
Enkuantu semináriu rejional ne’e JSMP realiza ona iha munisípiu Baukau, Dili inklui Kovalima, no seminériu sei hala’o durante loron tolu, tanba hetan fundus husi União Europia no apoiu mós husi CEPAD.
Semináriu ne’e hetan partisipasaun máximu husi komunidade suku Labarai, Kamanasa, Zulo, Matai, Suailoro no Raimea.(*)
