Tempotimor (Kovalima)-Sábadu (20/11/2021) fim de semana ne’e jornalista www.tempotimor.com dadalia ho negosiante sira iha merkadu Suai katak, sasan folin sa’e tanba menus importasaun husi Indonézia.
Tuir Lusiano Afonso ba www.tempotimor.com katak, iha merkadu Suai sasan sembako mak folin sa’e maka’as, tanba ne’e husu ba parte releveante atu haree no kontrola.
“Agora sasan hanesan sembako ne’e folin sa’e, tanba saida? Agora mina bimoli sa’e ba $7.00, uluk iha $6.00, depois bensin ákua boot ida sa’e ba $2.00, ne’ebé husu ba ministériu relevante atu haree no husi tuir, tanba iha situasaun ida hanesan ne’e mak sasan folin sa’e ne’e ami bele mate,” katak Afonso ba www.tempotimor.com iha merkadu Suai, Sábadu (20/11).
Iha sorin seluk negosiante Rosalina Mendonça Amaral dos Santos sente triste tanba sasan ne’ebé sira hola hodi faan tutan hola na’in menus, tanba sasan folin sa’e.
“Sasan folin sa’e ne’e husi modo kedas, ami sosa iha ema ne’e futun tolu ki’ikoan ne’e mak dollar ida no mina bimoli uluk $6.00 agora sa’e ba $7.00, ne’ebé ami-nia modo sira ne’e dalaruma la folin no ami mós hetan rendimentu oituan loos,” katak Nia.
Hatán ba preokupasaun ne’e xefe merkadu Suai, Mafalda Cardoso da Costa katak, stock husi Indonézia mak menus tama mai Kovalima, tamba ne’e afeta ba folin sasan iha merkadu Suai.
“Ami rona katak stock mak hotu husi Indonézia tama mai, tanba ne’e mak sasan sembako folin sa’e, ne’ebé ida ne’e los ka lae hau sei hato’o ba sira iha munisípiu hodi haree ba sasan folin sa’e ne’e,” Katak Mafalda.(*)
