Tempotimor (Kovalima)-Governu liuhusi Sekretária Estadu Igualidade no Inkluzaun (SEII) asina akordu ho grupu 16 iha munisípiu Kovalima no apoiu orsamentu rihun $32.000 atu hakbi’it ba feto maluk sira iha vida ekonómia.
Iha asina akordu ne’e reprezentante SEII, Xefe Departamentu Planeamentu no Monitorizasaun, João Lino Guterres katak, objetivu husi apoiu orsamentu ba grupu feto sira ne’e tamba SEII iha programa hakbi’it feto maluk sira iha vida Ekonomia.
“Hodi SEII nia naran hakarak hato’o agradese wain ba ita-boot sira ne’ebé iha inisiativa di’ak hakarak halo negosio, liu-liu ba inan-feton sira tamba SEII iha programa hakbi’it feto iha iha ekonomia no polítika,” dehan João ba jornalista sira iha Suai, Sesta (03/12).
Nia afirma, kada tinan SEII aloka orsamentu ba ina-feton sira bele sai husi ki’ak no mukit nomós redúz violénsia, tamba violénsia dalaruma mai husi fatór ekonómia menus iha uma laran.
Iha fatin hanesan reprezetante administradór munisípiu Kovalima, Francisco Tatamero enkoraza grupu sira husi suku tenke haki’ak animál sira inklui kuda modo liuhusi grupu.
“Imi forma grupu iha Suku tenke haki’ak Manu, Fahi, Karau inklui kuda modo parte hortikultura nian liuhusi osan ne’ebé ita-nia Sekretária Estadu Igualidade no Inkluzaun fó apoiu ona ba ita-boot sira, atu nune’e ita-boot sira bele hasai aan husi susar no ki’ak. Tamba estadu hanoin di’ak hodi apoiu osan hodi hakbi’it vida ekonómia iha uma laran liuhusi imi-nia kreatividade sira,” Katak Nia.
Enkuantula Xefe Grupu Feto “Rona Nuan Talas”, Blandina Pereira Abuk insatisfaz ho transferénsia orsamentu husi SEII, tamba orsamentu rihun rua de’it, maibé transfere ba konta bankária tenke dalarua.
“Orsamentu rihun $2.000.00 de’it, tamba sa ita-boot sira bele transfere dala rua? primeiru SEII fó uluk $800.00 no segundu mak foin fó fali rihun $1.200.00 mai ami-nia grupu. Ho ida ne’e mak ami ladun satisfaz, nusa mak nai ulun sira lakohi fó hotu kedas para ami sosa ami-nia materiál no mákina sira ne’ebé ami atu prodúz tais, kamizola no vestidu sira ba ema sira ne’ebé hela atu produs ba sira,” Nia informa.
Entertantu relasiona ho asina akordu entre SEII ho grupu sira ne’e, João husu eskipa grupu sira atu buka manezamentu didi’ak ba orsamentu ne’ebé husi SEII fó ona apoiu, tamba tuir akordu tinan ida grupu sira fó fila osan inan ba SEII atu nune’e bele fó oportunidade fali ba grupu seluk ne’ebé atu haki’ak no loke negósiu ruma, tamba orsamentu ne’e rotativa.(*)
