Tempotimor (Kovalima)-Komandante Polísia Nasionál Timor-Leste (PNTL) Munisípiu Kovalima, Superintendente António Maria de Sá husu Autoriedade Nasionál Petróleu no Minerais (ANPM) atu fó xamada atensaun ba kompañia internasional Timor Resource, tanba la asegura mina ten hodi estraga komunidade nia to’o no natar lubuk ida ona.
Komandante ne’e afirma, tuir prediksaun ba perfurasaun Mina matan Feto Kmaus atinje metru rihun 1.000 foin hetan mina, maibé seidauk to’o tarjetu mina sulin sai nadodon hodi estraga komunidade sira-nia natar no to’os lubuk ida inklui fó imapktu ba meiu ambiente sira.
“Foin dadauk ne’e prediksaun perfurasaun Mina Matan Feto Kmaus to’o 1000 metrus maka foin hetan mina, maibé seidauk to’o 1000 metrus mina suli arbiru hodi fó impaktu negativu ba komunidade sira-nia to’os ho natar iha ne’ebá, ne’ebé ha’u husu ba ANPM fó atensaun ba kompaña Timor Resource atu labele akontese tan hanesan ne’e,” dehan António bainhira partisipa iha disiminasaun ba lei kódigu mineriru nian iha salaun administrasaun munisípiu Kovalima, Sesta (03/12).
Hatán ba kestaun ne’e, Prezidente Autoridade Nasionál Petroleu no Minerais (ANPM), Florentino Soares Ferreira dehan, iha situasaun perfurasaun, mina sempre infrenta risku sira, tanba ne’e ekipa ANPM halo ona diskusaun ho kompaña Timor Resourse, hodi hatur ona investigasaun ida hodi halo tuir kontratu partilla produsaun molok fó xamada tuir kompeténsia.
“Ha’u atu dehan de’it situasaun perfurasaun mina ne’e sempre infrenta risku hansan ne’e, iha risku sira hansan ne’e maka ita hatur ona saida maka ita bolu planu jestaun ambientál, ami-nia ekipa diskuti ona ho Timor Resourses husi diskusaun ne’e tomak ita hatur ona investigasaun ida, buat hotu ita halo tuir saida maka ita bolu partilla kontratu produsaun, husi rezultadu ne’e iha maka bele fó xamada tuir kompeténsia no tuir padroens ne’ebé iha industria nian,” Presidente ANPM dehan.
Entretantu mina matan Feto Kmaus ne’e hetan lansamentu husi Primeiru-Ministru (PM), Taur Matan Ruak no Xefe Estadu Falintíl Forsa Defeza Timor-Leste (F-FDTL), Tanente Jenerál Lere Anan Timur iha loron 27 outubru 2021.(*)
