Tempotimor (Kovalima)-Sesta-feira (03/12/2021) Francisco Gusmão simu ona responsabilidade nu’udar diretór Sekretariadu Tékniku Administrasaun Eleitoral (STAE) munisípiu Kovalima, hafoin eleitu hodi troka diretór sesante STAE, Claúdio Cardoso.
Iha serimónia handover servisu ne’e, Diretór STAE sesante, Claúdio Cardoso promete no kontinua prontu hodi servi povu no sei apoiu nafatin diretór foun iha kualker situasaun.
“Hanesan diretór sesante ha’u prontu atu servi no apoiu diretór atuál iha kualker situasaun iha ambitu servisu STAE nian, hanesan orgaun tékniku de administrasaun eleitorál” dehan Claúdio iha edifísiu STAE munisípiu Kovalima, Sesta (03/12).
Nia mós husu ba diretór atuál atu haree ba kotuk no hodi hateke ba oin, tanba iha esperénsia barak iha tempu pasadu ne’ebe liu ona.
“Haree ba kotuk hodi hateke ba oin iha esperiénsia barak ne’ebé mak ita liu, todan ka kaman iha kabás ita hotu senti nu’udar orgaun eleitorál ne’ebé mak hamutuk hodi hala’o atividades rutina ka atividades lor-loron, atividades resensiamentu eleitorál no ámbitu eleisaun nian,” tenik diretór sesante ne’e.
Iha fatin hanesan diretór atuál STAE munisípiu Kovalima, Francisco Gusmão katak, ema bele kleur servisu iha STAE, maibé foun iha asume kargu nu’udar diretór.
“Ha’u hakarak esklarese katak ema bele servisu kleur iha STAE no hala’o beibeik atividades rutinas, maibé foun ba ha’u asume kargu diretór. Ho ida ne’e ha’u presiza apoiu másimu husi diretór sesante ho funsionáriu tomak ne’ebé halao atividade iha STAE Munisipiu para bele atinje susesu iha kualker atividades liu-liu ba atividades iha periodu eleisaun nian,” Nia dehan.
Entretantu serimónia entrega poder ne’e hala’o iha salaun edifísiu STAE munisípiu Kovalima ne’e marka prezensa husi reprezentante Administradór munisípiu Kovalima, reprezentante Komandante PNTL, Diretór CNE Munisípiu Kovalima, reprezentante Diretór Nasionál STAE no funsionáriu STAE munisípiu Kovalima nian..*
