Tempotimor (Kovalima)-Domingu horseik Konsellu Imprensa (KI) atribui kartaun profesionál ba pesoál jornalista na’in 12 ne’ebé durante ne’e hala’o knaar jornalístiku iha munisípiu Kovalima.
Iha atribuisaun karteira profesionál ne’e, Prezidente Konsellu Imprensa (KI), Virgílio Guterres husu ba jornalista sira atu servisu ho profesionál liután ho respeita públiku hodi nune’e labele halo akuzasaun ba ema ka pesoál ruma.
“Ba jornalista sira ne’ebé iha ona Kartaun Profisional katak, respeita públiku sira, ita nia fontes no ouvintes sira, atu nune’e entre ita-nia fontes sira labele mosu konflitu, labele halo akuzasaun ba ema depois labele fó sai notísia ne’ebé laloos ka hoax,” dehan Prezidente KI ba jornalista sira iha Suai, Ohin (05/12).
Virgílio mós husu ba jornalista sira ne’ebé simu ona kartaun karteira profesionál mak atu involve aan iha partidu polítiku tenke devolve hikas prioridade KI nian.
“Maluk sira ne’ebé deside atu tuir eleisaun ka kampaña partidu politíku ruma di’ak liu kartaun sira ne’e intrega ba Konsellu Imprensa, depois remata ona mak hakrak kontinua ho imi-nia servisu nu’udar jornalista bele foti fila fali,” katak Nia.
Entretantu jornalista sira ne’ebé hetan karteira profesionál husi KI iha munisípiu Kovalima mak hanesan, Sancho Alves Nahac, Aliansa Serafina, José Ferreira, Adelaide Gorete Afonso, Saturnino Soares, Joana Cardos, Cesaltino Gusmão, Ermelito de Jesus, Edinho Moniz do Rego husi Rádiu Komunidade Kova Taroman (RCCT), Januário de Jesus Barros husi www.tempotimor.com, Júlio Salinas Soarea husi Jornal Bussines Timor inklui Carlito dos Reis husi RTTL,EP.(*)
