Tempotimor (Kovalima)-Centru Nasionál Chega (CNC) sensibiliza ba estudante sira iha Eskola Sekundária Jerál Públika (ESJP) Suai kona-ba desentraliza istória rezisténsia nasionál durante tinan 24, nune’e jerasaun foun sira bele hatene.
“Objetivu husi formasaun ne’e atu desentraliza istória ba ita-nia luta na’in sira ba rai ida ne’e, atu nune’e ita-nia jerasaun foun sira bele hatene ita-nia luta na’in sira-nia luta saida mak akontese durante tinan 24 nia laran iha Timor-Leste,” dehan Ofisiál Formadór CNC, Matias do Santos ba joprnalista sira, Ohin (06/12).
Formasaun ne’e foka liu ba transmisaun memória interjerasionál hanesan fatin istóriku sira hanesan komarka, fatin konsertasaun no masakre sira.
“Ami hala’o formasaun ba estudante sira ne’e ami haree liu ba transmisaun memíoria interjerasionál iha trasmisaun memória interjerasionál ne’e iha atividade maka sei lori estudante sira hodi ba vizita fatin istóriku sira hanesan komarka, fatin ne’ebé ita-nia luta na’in sira hela ba hodi halo funu no fatin konsertasaun ne’ebé ita-nia luta na’in sira sorumutu iha tempu ne’ebá hodi halo demostrasaun hodi hasoru Indonézia, no fatin masakre, atu nune’e jerasaun foun sira bele hatene,” katak Matias.
CNC mós husu ba estudante sira atu hatutan memória ne’ebé sira-nia inan-aman nia luta ba ukun rasik an durante tinan 24 nia laran.
” Iha formasaun ne’e oinsa estudante sira bele hakerek rasik sira-nia inan-aman ho familia nia istória luta nian, tanba durante ne’e ema barak mak partisipa no inklui mós estudante sira-nia família,” nia tenik.
Reprezentante estudante ESJP Suai, Meliana do Carmo sente kontenti tanba tuir ona formasaun kona-ba oinsa atu hakerek istória rezisténsia nasionál nian.
“Ami kontenti tebes tuir formasaun ida ne’e, tanba liuhusi formasaun hirak ne’e ami bele aprende, hanesan reprezenta estudante iha ESJP ida ne’e agradese tebes ba ekipa CNC tanba fahe ona imformasaun ba ami, atu hakerek istória ne’ebé apa-ama sira nian luta ba rai ida ne’e,” katak Meliana.
Entretantu formasaun kona ba istória rezisténsia nasionál ne’ebé CNC apoiu ba estudante sira ne’e, hala’o iha salaun Eskola Sekundária Jerál Públika Suai, munisípiu Kovalima.(*)
