Tempotimor (Kovalima)-Servisu Saúde Munisípiu Kovalima (SSMK) hamutuk ho Cruz Vermelha Timor-Leste (CVTL) komemorasaun loron mundiál HIV SIDA ho tema “Timor-Leste livre husi Estigma no Diskriminasaun ba ho HIV SIDA no nia responsablidade ita hotu nia lian”.
Tuir xefe programasaun Servisu Saúde Munisipiu Kovalima (SSMK) João Ramalho katak, iha ámbitu loron mundiál HIV SIDA iha Timor-leste, nune’e SSMK hamutuk ho CVTL realiza semináriu kona-ba prevensaun ba vírus refere.
“Ita ohin loron halo semináriu iha CVTL Kovalima, tamba iha ámbitu serimónia loron mundiál HIV SIDA ne’ebé monu iha loron 1 fulan dezembru tinan ne’e iha Timor-Leste, tanba ne’e ita iha munisípiu Kovalima hodi prienxe atividade ohin loron hodi fahe kona-ba moras HIV SIDA ba iha kolega volontáriu no funsionáriu sira iha CVTL filial Kovalima atu nune’e sira bele habelar no fahe informasaun ba iha juventude, komunidade no família sira,” katak João ba jornalista sira iha salaun CVTL Filiál Kovalima, Segunda (06/12).
Koordenadór CVTL Filiál Kovalima, Domingos Gabrila Amaral afirma, semináriu loron mundiál HIV SIDA hala’o iha CVTL Kovalima tamba hetan husi governu.
“Ita realiza semináriu tamba komemora loron HIV SIDA iha munisípiu Kovalima no loloos ne’e ita komemora loron HIV SIDA iha dia 1 de dezembro, tamba ita preokupa ho atividade balu entaun ohin loron maka ita realiza ho ida ne’e ita la komemora eventu ne’ebe boot, maibé ita bolu de’it oradór husi Servisu Saúde Munisípiu Covalima,” nia hakotu.(*)
