Tempotimor (Kovalima)-Autoriedade Konsellu Imprensa (KI) nian sensibiliza kona-ba lei no regulamentu konsellu imprensa nian ne’ebé ligadu ho direitu resposta ba autoriedade munisípiu Kovalima hodi servisu hamutuk ho jornalista sira.
Prezidente KI, Virgílio da Silva Guterres hatete, iha sorumutu ne’e partilla papél Konsellu Imprensa nian ba autoridade sira iha Kovalima hodi enkoraza autoridade sira iha munisípiu hodi utiliza direitu no resposta.
“Ami mai iha hasoru malu ho autoridade sira iha ne’e ami fahe informasaun kona-ba papél Konsellu Imprensa nian liu-liu atu enkoraza autoridade sira iha munisípiu Kovalima hodi utiliza direitu no resposta hasoru informasaun ka notisia ruma ne’ebé ke fó sai la tuir sira nia deklarasaun, tamba dalabarak autoridade sira sai fontes informasaun ita média sira barak halo komunikasaun husi Kapital Dili mak mai de’it, entaun dala ruma média sira sita sala ho ida ne’e mak ami ko’alia ho autoridade sira iha munisípiu Kovalima atu hatene utiliza direitu ida ne’e,” dehan Prezidente KI ba jornalista sira iha salaun administrasaun munisípiu Kovalima, Segunda (06/12).
Autoriedade KI ne’e enkoraja autoridade sira iha Kovalima atu fó espasu ba jornalista sira hodi hetan informasaun.
“Buat ne’ebé ami ko’alia ho autoridade sira mak oinsa atu loke asesu ne’ebé sufisiente ba jornalista destakadu no jornalista sira ne’ebé servisu iha munisípiu atu hetan informasaun, tamba jornalista sira iha direitu tomak atu asesu informasaun,” Katak Virgílio.
Virgílio mós promete oinsa atu kapasita ka potensializa joven sira ne’ebé oras ne’e tuir formasaun iha SEKomS atu responsabliza ba manutensaun ka produsaun informasaun iha suku liu-liu iha kuadru programa Naroman ba Suku ne’ebé mak husi SEKomS no MAPKomS.(*)
