Tempotimor (Kovalima)-Ministériu Saúde liuhusi programa Nasionál Malaria, servisu hamutuk ho saúde munisipál no postu hodi fahe moskuiteiru ba komunidade sira iha suku Datotolu, postu administrativu Fohorem, munisípiu Kovalima.
“Ministériu Saúde hanesan ministériu implementadór liu-liu iha programa malaria nasionál kolabora hamutuk ho servisu saúde munisípiu Kovalima nomós servisu hamutuk ho sentru Saúde Fohorem nian, ami-nia hakarak mak komunidade sira tenke uza moskuiteriu ho didi’ak, kalan antes toba tenke uza moskuiteiru, depois komunidade sira labele lori fali moskuiteiru hodi ba kesi lutu no kaer boek iha mota laran, tamba ministériu saúde la autoriza,” dehan ofisiál programa malaria nasionál, Juliana do Rosário ba jornalistas sira iha Datotolu, Ohin (07/12).
Nia akaresenta, molok distribui moskuiteiru ba komunidade sira, ekipa Ministériu Saúde servisu hamutuk ho autoriedade lokál sira hodi rekolla uluk dadus molok fahe moskuiteriu sira ne’e.
“Fahe Moskuiteiru ba komunidade sira iha Datotolu ne’e ho objetivu atu halo prevensaun malaria husi komunidade iha Timor-Leste, mezmu ke iha Kovalima liu-liu iha postu Fohorem laiha ona kazu, maibé ita nafatin halo prevensaun liuhusi uza moskuiteiru,” katak Nia.
Iha fatin hanesan komunidade Basilio Soares senti kontente ho apoiu moskuiteiru ne’ebé Ministériu Saúde fahe.
“Ami kontente tebes, tamba Ministériu Saúde bele ajuda ona ami fó moskuiteiru. Durante ne’e ami-nia oan sira kalan la toba tamba susuk barak tebes no tata ami-nia oan sira halo isin manas beibeik,” dehan Basilio.(*)
