Tempotimor (Kovalima)-Asosiasaun Hadomi Difisiénsia Matan iha Timor-Leste (AHDMTL) halo semináriu loron direitu humanus ba ema hotu inklui ema defisiensia ho tema “Igualdade hamenus dezigualdade hakat ba oin ho direitus umanus” no ema hotu moris livre iha dignidade ho direitu hanesan.
Tuir Diretór Ezekutivu AHDMTL, Gaspar Afonso husi diskursu katak, komunidade sira labele halo diskriminasaun ba ema ho difisiente nomós husu ba Inan-Aman atu enkoraja oan sira ne’ebe problema matan no problema seluk tan.
“Ema hanoin ami mak defisiente ne’e la vale buat ida ona no la hare buat ida ne’e atu halo saida?, maibé buat ne’e hatudu nakfilas ne’e mak ha’u foin hatete dehan, imi hanoin ami matan la hare la halo buat ida, ne’e sala, ne’ebé husu ba inan-aman sira, karik ita-boot sira nia-oan iha problema matan hanesan ami, husu Inan-Aman atu enkoraja sira ba aprende iha Dili, tamba objetivu organizaun ne’e hamriik atu luta ba ema ho defisiente matan no atu kore husi stigma oioin, liu-liu husi analfanetizasaun,” hateten Diretór Ezekutivu AHDMTL iha Aldeia Aidawan Suku Beco, Sesta (10/12).
Iha sorin seluk, reprezentante administradór postu administrativu Suai, Laurentino de Jesus apresia ba programa AHDMTL nian tanba hodi hakbesik ba komunidade sira atu matan moris no ba ema ho defisiente sira.
“Husu ba xefe suku ba to’o sede Aldeia sira atu tau matan moris no neon na’in ba maluk ema ho difisiente sira, nune’e bele registu ba responsável ba ema ho difisiente sira, tanba iha destakadu munisípiu iha ona, labele husik liu de’it,” katak Nia.
Entertantu semináriu ne’e realiza tanba hetan fundus husi Embaixada Noba Zelandia hamutuk rihun $2.000-resin, husi Austrália Volunter International (AVI) rihun $1.000 ne’ebé ho totál orsamentu rihun $3.000-resin hodi realiza atividades loron direitus humanus no komemora loron mundial ba ema ho defisiente.(*)
